ચેન્નઈથી મુંબઈ પ્લેનમાં અને મુંબઈથી ગોવા ક્રૂઝમાં જવાનું સપનું ‘રોળાયું’અમદાવાદના ટૂર ઓપરેટર સહિત ૪૦૦ લોકો સાથે રૂ. ૫૭ લાખનું ફ્રોડ

એજન્ટે ખુદની માલિકીના ક્રૂઝમાં મોકલવાની જાળ બિછાવીને વ્યક્તિદીઠ રૂ. રપ હજાર વસૂલી લીધા

અમદાવાદ, મંગળવાર

ક્રૂઝમાં ગોવા લઈ જવાની વાત કરી અમદાવાદના ટૂર ઓપરેટર સહિત ૪૦૦ લોકો સાથે ૫૦ લાખ રૂપિયાની છેતરપિંડી કરવામાં આવી હોવાની ચોંકાવનારી ઘટના સામે આવી છે. એજન્ટે ચેન્નઈથી મુંબઈ પ્લેનમાં અને મુંબઇથી ગોવા ક્રૂઝમાં મોકલવાના નામે વ્યક્તિદીઠ રપ હજાર રૂપિયા લઈ લીધા હતા. ખોખરાના પરિષ્કાર-રમાં રહેતા ઇલાંગો મુદલિયારે બે વ્યક્તિઓ સામે ઠગાઈની ફરિયાદ નોંધાવી છે. ઇલાંગો નવરંગપુરાના સ્વસ્તિક ચાર રસ્તા પાસે ટ્રાવેલ્સ હોલિડેઝ નામથી ટૂર્સ એન્ડ ટ્રાવેલ્સનો વેપાર કરે છે. વર્ષ ૨૦૨૧માં ઇલાંગો અને તેનો મિત્ર હસુભાઈ પટેલ ગોવા ગયા હતા. તે વખતે હસુભાઈના મિત્ર જિગરભાઈ પટેલ સાથે મુલાકાત થઈ હતી. તે વખતે જિગરે ઇલાંગોને કહ્યું હતું કે હું જોજો બસના નામથી ટૂર્સ એન્ડ ટ્રાવેલ્સનો વ્યવસાય કરું છું અને મારું ક્રૂઝ સુરતથી દમણ જાય છે. તેઓ આમ કહીને એકબીજાના વધુ પરિચયમાં આવ્યા હતા.