2023માં સોનાનો ચળકાટ વધશે: ભાવ ર 60,000ને વટાવે તેવી શક્યતા

ડોલરના મૂલ્યમાં નબળાઇ અને અન્ય વૈશ્વિક પરિબળોને પગલે નિષ્ણાતો સોનામાં વધુ તેજીની આગાહી

છેલ્લા કેટલાક સમયથી સોના-ચાંદીની ઝડપી તેજીએ જાણકારોને આશ્ચર્યમાં મૂકી દીધા છે. સપ્તાહની શરૂઆતમાં એમસીએક્સ ઉપર ૧૦ ગ્રામ સોનાનો ભાવ રૂ.૫૬,૧૭૫ની સપાટીએ પહોંચ્યો હતો. ચાંદી પણ રૂ.૭૦,૦૦૦ની નજીક છે. વૈશ્વિક બજારમાં સોનું ૧,૮૫૦ ડોલરનો ભાવ વટાવીને આઠ મહિનાની ઊંચી સપાટીએ પહોંચ્યું છે. ડોલરના મૂલ્યમાં નબળાઇ અને અન્ય વૈશ્વિક પરિબળોને પગલે નિષ્ણાતો સોનામાં વધુ તેજીની આગાહી કરી રહ્યા છે.

વિશ્લેષકોના જણાવ્યા અનુસાર અમેરિકન અર્થતંત્રના તાજેતરના ડેટાને પગલે ડોલર સતત ઘટી રહ્યો છે અને સોનાના ભાવ વધવા માટે આ સૌથી મોટું પરિબળ છે. ઉપરાંત, વિશ્વમાં સોનાનું સૌથી મોટું વપરાશકાર ચીન હવે તેની સરહદો ખુલ્લી મૂકી રહ્યું છે. ઘણા સમયથી ‘ઝીરો કોવિડ પોલિસી’ને પગલે ચીનમાં સોનાની માંગ પર નોંધપાત્ર અસર થઈ હતી. જોકે, આગામી સમયમાં ચીનના નવા વર્ષને પગલે ત્યાં પણ સોનાના વપરાશમાં વધારો થવાનો અંદાજ છે.