பெண்களே நாட்டின் மிகப் பெரிய நம்பிக்கை

சுதந்திர தின உரையில் குடியரசுத் தலைவர் முர்மு

புது தில்லி, ஆக. 14: நாட்டின் மிகப் பெரிய நம்பிக்கையாக பெண்கள் திகழ்கின்றனர் என்றார் குடியரசுத் தலைவர் திரௌபதி முர்மு.

நாட்டின் வளர்ச்சியில் பல்வேறு பகுதிகளுக்கு இடையேயான ஏற்றத் தாழ்வுகள் குறைந்து வருவதாகவும் அவர் தெரிவித்தார்.

நாடு சுதந்திரமடைந்து 75 ஆண்டுகள் நிறைவடைந்துள்ளன. நாட்டின் 76-ஆவது சுதந்திர தினம் திங்கள்கிழமை (ஆகஸ்ட் 15) நாடு முழுவதும் கோலாகலமாகக் கொண்டாடப்படவுள்ளது. சுதந்திர தினத்துக்கு முந்தைய நாள் குடியரசுத் தலைவர் நாட்டு மக்களுக்கு உரையாற்றுவது வழக்கம்.

அதன்படி, கடந்த ஜூலை 25ஆம் தேதி குடியரசுத் தலைவராகப் பொறுப்பேற்றுக் கொண்ட திரௌபதி முர்மு, முதல் முறையாக நாட்டு மக்களுக்கு ஞாயிற்றுக்கிழமை தொலைக்காட்சி வாயிலாக உரையாற்றினார். அப்போது அவர் கூறியதாவது:

சுதந்திரதினத்தைக் கொண்டாடும் வேளையில், விடுதலைப் போராட்ட வீரர்களின் தியாகத்தை மக்கள் எண்ணிப் பார்க்க வேண்டும்.

நாட்டின் சுதந்திரத்தின் 75ஆவது ஆண்டு கொண்டாட்டங்கள் அனைத்தும் மக்களுக்கானவை.

நாட்டைத் தன்னிறைவு அடையச் செய்வதும் அக்கொண்டாட்டங்களின் ஒரு பகுதியே.

'வீடுதோறும் தேசியக் கொடி' இயக்கம் தொடர்ந்து முன்னெடுக்கப்பட்டு வருகிறது. நாட்டின் அனைத்துப் பகுதிகளிலும் தேசியக் கொடி பட்டொளி வீசிப் பறக்கிறது.