போர் களம்

"என் புள்ள ரஜினி" -நெகிழ்ந்த சிவாஜி!

- நக்கீரன் கோபால்

'சி.எம்.கிட்ட நான் சொல்றேன் ஸார். இதுக்கு நானே பொறுப்பேத்துக் கறேன்' என்றேன்.

எல்லோரும், 'வேண்டாம் தயவு செய்து சொல்லாதீர்கள்' என்று ஒருமித்துச் சொன்னார்கள். எனக்கு ரொம்பக் கஷ்டமாக இருந்தது. இவர்கள் எதற்காக இப்படிப் பயப்படுகிறார்கள்? எதற்காக நான் முதல்வரிடம் பேசக்கூடாது என்கிறார்கள்? என்றே எனக்குப் புரியவில்லை. அவர்களது அச்சம் தேவையற்றது என்று நினைத்தேன்.

'சரி ஸார், ஒண்ணு பண்ணுங்க. எனக்கு இப்படிப் பண்றது பிடிக்கலா. நான் இந்த விழாவுக்கு வரவில்லை. நீங்களே நடத்திடுங்க' என்றேன்.

ரஜினி இப்படிச் சொன்னதும்... விழாக் குழுவினர் அனைவருக்கும் அதிர்ச்சி!

அதன்பின் என்ன நடந்தது?

'செவாலியே' விருது பெற்ற சிவாஜி சாருக்கு நடந்த பாராட்டு விழா நிகழ்ச்சி நிரலில் சிவாஜி சாருக்கு முக்கியத்துவம் இல்லாம இருந்ததுனால் செயலாளரும் அதுக்கு ஒத்துக்கிட்டு சொல்லியிருக்காரு. ஆனா ஜெ., அத மாத்தச் சொன்னார் ரஜினி. நிரல மாத்தக்கூடாது, யாரு மாத்துனது? அப்படியே இருக்கட்டும்'னு சொல்ல... திரையுலகத்தைச் சேர்ந்த விழாக் குழுவினரும் 'அப்படியே இருக்கட்டும் ஸார், நாம மாத்த வேண்டாம்'னு ரஜினிய சமாதானப் படுத்தினார்கள். ஆனா ரஜினி, 'இந்த விழாவுக்கு வரல' எனச் சொன்னதும்... எல்லோருக்கும் அதிர்ச்சி!

இந்த விஷயங்களை ரஜினி எழுதிய கட்டுரையில் கடந்த அத்தியாயத்தில் பார்த்தோம். அந்தக் கட்டுரையோடு தொடர்ச்சி...

"எனக்கு இந்த நிகழ்ச்சி நிரல் பிடிக்கல. அதனால நான் அவங்கட்ட... 'சரி ஸார், ஒண்ணு பண்ணுங்க. எனக்கு இப்படிப் பண்றது பிடிக்கல. இந்த விழாவுக்கு வரல. நீங்களே நடத்திடுங்க'ன்னு சொன்னேன்.

அதற்கு அவர்கள், 'இல்ல ஸார், எல்லா விழாவுக்கும் நீங்க இப்படியே பண்றீங்க. நீங்க ஊரில் இருந்துகிட்டே ஃபிலிம் சிட்டி திறப்பு விழாவுக்கு வரவில்லை. இதற்கும் வரலைன்னா நல்லா இருக்காது. சிவாஜி ஸாருக்காகவாவது நீங்க வந்துதான் ஆகணும்' என்றெல்லாம் பேசி என்னைச் சமாதானப்படுத்தினார்கள்.

நான் சொன்னேன்... 'சரி ஸார்! நான் விழாவுக்கு வர்றேன். ஆனால் தயவு செய்து என்னைப் பேசச் சொல்லாதீங்கள். என்னாலே என் மனசுக்குள்ளே எதையும் மறைச்சு வைத்துக் கொள்ள முடியாது. விழா மேடையிலே நான் ஏதாவது பேசிடுவேன்' என்று சொன்னேன். அவர்கள் விடவில்லை. 'இல்லை ஸார், நீங்க மேடையிலே பேசித்தான் ஆகணும்' என்று சொன்னார்கள்.