சேலம் மாநகராட்சி! பணி நியமன ஊழல்!

சேலம் மாநகராட்சியில் விதிகளுக்குப் புறம் பாக பணி நியமனங்கள் செய்த விவகாரத்தில், ஐ.ஏ.எஸ். அதிகாரி முதல் தேர்வுக்குழுவில் இடம் பெற்ற பொறியாளர்கள் வரை அனைவரும் துறைரீதியான நடவடிக்கை பாய்கிறது.

சேலம் மாநகராட்சி பொறியியல் பிரிவில் காலியாக 6 செயல்திறன் உதவியாளர்கள் (ஸ்கில்டு அசிஸ்டன்ட் கிரேடு 2) பணியிடங்களை நிரப்ப, கடந்த 9.12.2022-ல் நேர்காணல் நடத்தப்பட்டது. இந்தப் பணியிடத்திற்குக் குறைந்தபட்ச கல்வித்தகுதியாக ஐ.டி.ஐ. படிப்பில் தேர்ச்சி பெற்றிருக்கவேண்டும்.

இந்தப் பணியில் சேர கடும் போட்டி நிலவியிருந்த நேர்காணலில் மொத்தம் 55 பேர் கலந்துகொண்டனர். விதிகளை மீறி, சேலம் மாநகராட்சியில் அப்போது செயற்பொறியாளராக இருந்த செல்வராஜின் மகன் கனிஷ்கரன், மேயர் ராமச்சந்திரனின் அலுவலக உதவியாளராக பணியாற்றிவந்த அனந்தசயனத்தின் மகன் ஹரீஷ், அஸ்தம்பட்டி மண்டல அலுவலகத்தில் பில் கலெக்டராகப் பணியாற்றி வரும் குப்புசாமியின் மகன் தமிழரசன், தி.மு.க. பிரமுகர்கள் சண்முகத்தின் மகன் ராமச்சந்திரன், அரியானூர் மோகனின் மகன் ஞானேஸ்வரன், மாஜி பில் கலெக்டர் சக்திவேலின் உறவினர் ஜெகதீஷின் மகன் ஸ்ரீதரன் ஆகிய 6 பேரும் நேர்காணலுக்கு முன்பே செயல்திறன் உதவியாளராகத் தேர்வு செய்யப் பட்டுவிட்டனர்.

ஆளுங்கட்சிப் புள்ளிகளின் அழுத்தம் காரணமாக அப்போது சேலம் மாநகராட்சி ஆணையராக இருந்த கிறிஸ்துராஜ் ஐ.ஏ.எஸ்., பணி நியமனக் கோப்புகளில் கையெழுத்துப் போட்டி இருப்பது 'நக்கீரன்' கள விசாரணையில் தெரியவந்தது.