આ... અબ તો લૌટ ચલેં!

ડોનાલ્ડ ટ્રમ્પના કડક વલણ છતાં આજે પણ એવા લોકો છે, જેમને ગેરકાયદે અમેરિકા જવું છે. આ લોકોને એમ છે કે અમેરિકામાં દૂધની નદીઓ વહે છે અને ડૉલર ઝાડ પર ઊગે છે. અમેરિકા જતાંવેંત સુખ-સમૃદ્ધિ મળી જશે એવું ધારતા, અમેરિકન ડ્રીમ સાકાર કરવા લાખો-કરોડો રૂપિયા તથા જીવ જોખમમાં મૂકનારા આવા શેખચલ્લીઓ ક્યારે ચેતશે?

- કેતન મિસ્ત્રી (મુંબઈ)

આ ને કહેવાય બલિહારી. નવા ચૂંટાયેલા ડોનાલ્ડ ટ્રમ્પની સરકારમાં વગર પગારે કામ કરતા ગવર્નમેન્ટ ઑફિસર ઇલોન મસ્કે બાવીસ વર્ષના મૂળ ભારતીય છોકરડા આકાશ બોબ્બાને ડિપાર્ટમેન્ટ ઑફ ગવર્નમેન્ટ એફિશિયન્સીમાં મહત્ત્વની કામગીરી સોંપી, લગભગ એ જ સમયગાળામાં અમેરિકાથી એક મિલિટરી વિમાનમાં ૧૦૪ ભારતીયોને ઠૂંસી અમૃતસર તગેડી મૂકવામાં આવ્યા. પાંચ ફેબ્રુઆરીએ અમેરિકાનું લશ્કરી વિમાન ત્યાં ગેરકાયદે રહેતા ભારતીયોને લઈને અમૃતસર ઊતર્યું એ સાથે જ સેંકડો લોકોના અમેરિકન જીવનનાં સોનેરી સપનાં સાકાર કરવા ખર્ચેલા લાખો રૂપિયા પાણીમાં ગયા. વધારામાં બદનામી મળી. ટ્રમ્પ પ્રશાસને કહ્યું કે આ તો હજુ શરૂઆત છે. હજી અનેક ભારતીયોને આ જ રીતે પાછા કાઢવામાં આવશે. પરત આવનારાઓમાં મહેસાણા, ગાંધીનગરના લોકો છે.

ચાર ફેબ્રુઆરીએ અમેરિકાના ટેક્સાસથી પ્લેન ઊડ્યું એ પહેલાં યુએસ કસ્ટમ્સ ઍન્ડ બોર્ડર પ્રોટેક્શને (સીબીપી) પ્લેનમાં ચડી રહેલા ભારતીયોનો વિડિયો વહેતો કર્યો એ સાથે જાતજાતના પ્રતિભાવ આવ્યા. ઘણા લોકોએ કહ્યું કે ૩૦ કલાકના ઉડ્ડયન દરમિયાન એમની સાથે અમાનવીય વહેવાર થયો.

અરે ભાઈ, સવાલ એ છે કે અમેરિકાએ ત્યાં ગેરકાયદે રહેતા પકડેલા ભારતીયો શું સ્વાતંત્ર્યસેનાની કે દેશભક્તો છે? હકીકત તો એ છે કે આમાંના ઘણાએ તો અમેરિકા રહી જવા માટે ભારતને ગાળો બોલી છે.

ગુજરાતની જ આ કન્યાનો કિસ્સો જુઓ. પાંચ ફેબ્રુઆરીએ આવેલા વિમાનમાં ગુજરાતની ૩૦ વર્ષી નિશિતા હતી. ૨૦૨૧માં કલોલના એક હ્યુમન સ્મગલરની વાતોમાં આવીને નિશિતાએ પતિને છૂટાછેડા આપ્યા, નાનકડી પુત્રી પણ પતિને સોંપી દીધી. એક દેશમાંથી બીજા દેશમાં માણસોની હેરાફેરી કરતા એ સ્મગલરે નિશિતાને કહ્યું કે પહેલાં એ અમેરિકા પહોંચશે, પછી એને બોલાવી લેશે. બેએક મહિના પહેલાં એજન્ટ અમેરિકા પહોંચી ગયો. અલબત્ત, ગેરકાયદે. એ પછી નિશિતાનો પ્રવાસ શરૂ થયો. અમદાવાદથી દુબઈ ને ત્યાંથી ૨૦ જાન્યુઆરી, ૨૦૨૫ના એ ઈલ્લિગલી મેક્સિકોયુએસ બોર્ડર પહોંચી, પણ બોર્ડર ક્રૉસ કરતાં પકડાઈ ગઈ. તરત એણે આશ્રયની અરજી કરી દીધી. એણે ઈમિગ્રેશન ઑફિસરોને કહ્યું કે હું અમુક કાસ્ટમાંથી આવું છું એટલે ભારતમાં મારી પર જુલમ થાય છે...

મને અહીં રહેવા દો.

જો કે નિશિતાની કારી ફાવી નહીં. ૧૦૪ ભારતીયોવાળા વિમાનમાં એને પણ ભારત રવાના કરી દેવામાં આવી.