ગેરરીતિ સામેની લડતે ગાદી અપાવી... ગેરરીતિને લીધે ગાદી ગઈ

ભ્રષ્ટાચાર સામેના જન આંદોલનના આગેવાન તરીકે રાજકારણમાં પ્રવેશેલા અરવિંદ કેજરીવાલ પછી તો પોતે જ એના કળણમાં ખૂંપતાં ગયા અને ચાદર કરતાં પગ લાંબા કરવાની લાયમાં દિલ્હી ગુમાવી બેઠા.

- હીરેન મહેતા

રાષ્ટ્રીય રાજકારણમાં અરવિંદ કેજરીવાલનો ઉદય અણધાર્યો હતો, પરંતુ એવું એમના હમણાંના પરાજય માટે કહી શકાય નહીં. દિલ્હી વિધાનસભાની ચૂંટણીમાં કેજરીવાલની અને એમની આમ આદમી પાર્ટીની હાર નિશ્ચિત લાગતી જ હતી. ભાજપની પ્રચંડ તાકાત સામે એકલા હાથે લડી લેવાનો હઠાગ્રહ કેજરીવાલને નડી ગયો. છોગામાં, સરકારી તંત્રમાં વ્યાપેલા ભ્રષ્ટાચાર સામેની લડતને સીડી બનાવી કેજરીવાલ રાજકારણમાં આવ્યા હતા એ ભ્રષ્ટાચારના કળણમાં એમનો જ પગ પણ પડી ગયો. પરિણામ બધાની સામે છેઃ બાર વર્ષમાં ત્રણ વખત દિલ્હીના મુખ્ય મંત્રી તરીકે ચૂંટાયેલા કેજરીવાલના પક્ષે સત્તા ગુમાવવી પડી અને કેજરીવાલ પોતે પણ ભૂંડી રીતે પરાસ્ત થયા.

રાજકારણમાં હાર-જીત થતી રહે છે. છેલ્લી બે વિધાનસભામાં ૯૫ અને ૯૦ ટકા જેટલી (૭૦માંથી અનુક્રમે ૬૭ અને ૬૨) બેઠક અંકે કરી ઐતિહાસિક વિજય મેળવનારી આમ આદમી પાર્ટી (આપ) આ વખતે બાવીસ બેઠક પૂરતી સીમિત રહી ગઈ છે અને આમ આદમી પાર્ટીને ઉધાર ખાતે લખાયેલી ચાલીસેચાલીસ બેઠક કબજે કરી ભાજપે ૨૭ વર્ષ બાદ દિલ્હીમાં ફરી સત્તા મેળવી છે.