ક્રાવ માગા ચીની સરહદે તહેનાત સૈનિકો શીખે છે ઈઝરાયલની માર્શલ આર્ટસ ટેક્નિક

લડાખ સરહદે ગલવાન વૅલી વિસ્તારમાં ચીની સૈનિકો સાથે થયેલી હાથોહાથની ઝપાઝપીથી ચેતી ગયેલી ભારતીય ફોજ હવે દુશ્મન સિપાહીઓને ઢેર કરવા આપશે એમની જ ભાષામાં જવાબ.

- નિતુલ ગજ્જર (વડોદરા)

જૂન ૧૪, ૨૦૨૦, ભારત-ચીનની સરહદ. ભારત અને ચીનની લડાખ સરહદે ગલવાન ખીણમાં મામલો તંગ તો હતો જ, પણ એ રાત્રે અચાનક ધમાધમી મચી ગઈ. બન્ને દેશના સૈનિકો જાણે યુદ્ધ માટે સજ્જ હોય એમ આમને-સામને આવી ગયા. જો કે બન્ને બાજુથી ગોળી ચલાવવાની જાણે બાધા હોય એમ બંદૂકનો કોઈએ ઉપયોગ ન કર્યો. એવામાં ભારતની એક ટુકડીનું ધ્યાન ગયું કે ચીનના કેટલાક સૈનિકોએ તો ભારતની સીમામાં ડેરાતંબુ તાણી દીધા છે. એનું નિરીક્ષણ કરવા ગયેલા ભારતીય સૈનિકો પર ચીને હુમલો કર્યો અને આપણા જવાનોને લોહીલુહાણ કરી મૂક્યા. છેલ્લાં ૪૫ વર્ષમાં પ્રથમ વાર ચીન અને ભારત વચ્ચેના સંઘર્ષે હાથોહાથની મારામારીનું રૂપ ધારણ કર્યું. એમાંય ચીનના સૈનિકો તો જાણે હુમલો કરવા જ આવ્યા હોય એમ પોતાની સાથે તીક્ષ્ણ ખીલા ખોડલાં લાકડાંનાં પાટિયાં, કાંટાળા તાર, વગેરે હથિયાર સાથે લઈને આવ્યા હતા.

દેખીતી રીતે આ ઘટનાથી ભારત સરકાર ચોંકી ગઈ. શેરીના છોકરાવ ઝઘડે એમ સીમાડે સૈનિકો હાથાપાઈ પર ઊતરી આવે એવું તો કોણે વિચાર્યું હોય? જો કે પછી તરત જ ચીનને એની ભાષામાં જવાબ આપવાનું નક્કી થયું.. અને હવે ગલવાન વૅલીના એ હિંસક કિસ્સાને ત્રણ વર્ષ થવા આવ્યાં છે ત્યારે ચીન સરહદે તહેનાત જવાનોને કૉન્ટેક્ટ કૉમ્બેટ ટેક્નિક (હથિયાર વગર લડવાની રીત)નું પ્રશિક્ષણ આપવાનું શરૂ થયું છે.

કૉન્ટેક્ટ કૉમ્બેટ ટેક્નિક એટલે કોઈ પ્રકારનાં શસ્ત્ર વગર, હાથોહાથની ઝપાઝપીનો પ્રકાર. ક્યારેક સામેવાળા પાસે શસ્ત્ર હોય તો પણ એને પળભરમાં ચિત કરી દેવાની કળા, જેથી એને શસ્ત્ર ચલાવવાનો મોકો જ ન મળે.