આણંદનું આ ગામ પણ બને છે યાયાવરી પક્ષીઓનું યજમાન

આણંદ જિલ્લામાં લાંભવેલ ખાતે પણ દર વર્ષે વિદેશી પક્ષીઓનું આગમન થાય છે. જો કે ઉલ્લેખનીય છે કે લાંભવેલમાં આવતાં પક્ષીની સંખ્યામાં દર વર્ષે નોંધપાત્ર ઘટાડો જોવા મળી રહ્યો છે. આ વર્ષે અહીં પ૦ ટકા ઓછાં પક્ષીનું આગમન થયું છે, જેનું મુખ્ય કારણ એ છે કે તળાવનો કેટલોક વિસ્તાર માટી મેળવવા ખોદી કાઢવામાં આવ્યો છે

આણંદ જિલ્લામાં તારાપુર નજીક કનેવાલમાં પણ શિયાળો બેસતાં જ સ્થળાંતરિત પક્ષીનું આગમન શરૂ થઈ જાય છે. એમાં ગ્રેલેગ ગુસ, ફ્લેમિંગો, લિટલ ડક, કૉમન ટીલ, ગડવાલ, વગેરેનો સમાવેશ થાય છે.

મિની કેદારનાથ નામના તીર્થસ્થાન માટે જાણીતા ગામ કનેવાલમાં પૂરતો ખોરાક અને રહેવાની વ્યવસ્થા હોવાથી વિદેશી પક્ષીઓનું આ પ્રિય સ્થળ છે અને દર વર્ષે અનેક પક્ષી આ ઋતુમાં અહીં આવે છે. વર્ષાનુંવર્ષ એમની સંખ્યામાં વધારો જોવા મળે છે.

કનેવાલના પાદરમાં આવેલા તળાવમાં છીછરું પાણી તથા આજુબાજુના વિસ્તારમાં ખેતર અને મોટા પોલ હોવાને કારણે પક્ષીઓને રહેવાની જગ્યા તથા ખોરાક-પાણી મળી રહે છે. આ વર્ષે અત્યાર સુધીમાં અહીં ફ્લેમિંગો, કાળો જલમાંજર (Bronzewinged Jacana), સફેદ પૂંછ (White-tailed Lapwings), પીળી પાનબગલી (Yellow Bittern), ફાંટીચાંચ ઢોંક (Asian Openbill), સફેદ પેણ (White pelican), ડોકમરડી (Eurasian Wyrneck), કૉમન પોર્ચાડ, ફ્લાય કેંચર, ગાજહંસ (Greylag Goose), બાર-હડડ ગુસ, વગેરે પક્ષીઓનું આગમન થઈ ગયું છે.