વિશ્લેષણ

આમ આદમીના રાજકારણની શતરંજમાં કેજરીવાલ મહાત કે સમાપ્ત!

- સુધીર એસ. રાવલ

ભારત જેવા વિશાળ લોકશાહી દેશમાં જ્યારે બારે માસ ચૂંટણીની મોસમ ચાલતી હોય અને અનેક રાજકીય પક્ષો, વિવિધ વિચારધારા, વિવિધ કાર્યશૈલી અનેકવિધ મુદ્દાઓ અને ચિત્ર-વિચિત્ર સંજોગો વચ્ચે આવી ચૂંટણી લડાતી રહેતી હોય, ત્યારે ચૂંટણીમાં હાર-જીત એ સામાન્ય ઘટના છે. આમછતાં જય-પરાજયની કેટલીક ઘટનાઓ ઇતિહાસનાં પાનાંઓ પર સવિશેષ મહત્ત્વ સાથે અંકિત થતી હોય છે, કારણ કે તેની અસર વ્યાપક અને દીર્ઘકાલીન હોય છે. વર્ષ-૨૦૧૪ની લોકસભાની ચૂંટણી આવી જ એક ચૂંટણી હતી, જેની અસર ભારતના રાજકીય પરિદૃશ્ય પર જ નહિ, સમય જતા સામાજિક, આર્થિક અને સાંસ્કૃતિક પરિદૃશ્ય પર પણ જોવા મળી છે. તાજેતરની દિલ્હી વિધાનસભામાં આમ આદમી પાર્ટીનો પરાજય થયો, તે ચૂંટણી પણ એવા કેટલાક સંદેશસભર પરિણામો લઈને આવી છે, જે તેને સામાન્ય ચૂંટણીઓ કરતાં અલગ તારવે છે. સત્તાનાં ૨૬ વર્ષના વનવાસ પછી ભારતીય જનતા પક્ષે ફરી દિલ્હીમાં સત્તા મેળવ્યા છતાં રાજકીય વર્તુળોમાં ભાજપની જીત કરતાં આમ આદમી પાર્ટીની હાર એ વિશ્લેષણ માટે મહત્ત્વનો મુદ્દો બન્યો છે અને તેનાં વાજબી કારણો છે.

આમ આદમી માટેનો વિકલ્પ :