ચર્નિંગ ઘાટ

ગટ ફીલિંગ : પેટને અને દિમાગને સંબંધ છે

- ગૌરાંગ અમીન

ગેસ પદાર્થની એક મૂળભૂત અવસ્થા છે, આધુનિક વિજ્ઞાન પ્રમાણે બાકીની ત્રણ અવસ્થા ઘન, પ્રવાહી અને પ્લાઝમા છે. અંગ્રેજી શબ્દ ગેસનો જન્મ થયો હતો ૧૯૫૦માં. મૂળ શબ્દ ગ્રીક ભાષાનો ખેઓસ છે, જેને અંગ્રેજીમાં કેઓસ કહે છે. ગ્રીક ખડચ ભાષામાં ગ બોલાય. સ્વિસ ચિંતક અને ચિકિત્સક તેમ જ ભૂત વગેરેમાં રસ લેનાર પાર્સેલસ માનતા કે સ્પિરિટ જે તત્ત્વથી બનેલા હોય છે તે અતિ સૂક્ષ્મ થયેલું પાણી હોય છે, તે માટે તે ગેસ શબ્દ વાપરતા. તેમની અસર હેઠળ સંશોધન કરતાં ફ્લેમિશ અલકૅમિસ્ટ વાન હેલમોન્ટે વાયુ માટે ગેસ શબ્દ પ્રયોજ્યો હતો. તેઓ વાયવીય અર્થાત્ ન્યુમેટિક કૅમેસ્ટ્રીના પિતા છે. સત્તરમી સદીની શરૂઆતમાં તેઓ એમના રોજના દિવસ જેવો એક દિવસ જીવતા હતા. તેઓ ખૂબ ઝેરી ગણાતા વુલફ્સબેન ફૂલ પર સંશોધન કરતા હતા. એમને ઘરના કામ માટે કશે જવાનું થયું એટલે એ કામનું સ્થળ છોડી ત્યાં ગયા. એ દિવસે સાંજે એમને થયું કે તેઓ કશું જુદો અનુભવ કરી રહ્યા છે. તેમને થયું કે એમનું સમજવું, કલ્પવું, ધારવું કે તારણ કાઢવું એમના માથામાં નથી ઘટતું, પરંતુ એમના પેટના ભાગમાં ક્યાંક ઘટે છે. કેટલાંય લોકો જે ગટ ફીલિંગ શબ્દપ્રયોગ વાપરે છે તેનો તેમને અનુભવ થયેલો. શું મામલો છે આ ગટ ફીલિંગ કે ઇન્સ્ટ્રિક્ટનો અને ગટનો?

હેલમોન્ટને એ જે અનુભવ થયેલો અને એમણે જે અનુભવને ઓળખી કાઢેલો તે ગટ ફીલિંગ ઘણા ઇન્સાઇટ કે ફોરસાઇટ કહી શકે છે. ઇન્સ્ટ્રશન એટલે કે તર્કની મદદ વિના થતું જ્ઞાન, પ્રત્યક્ષ જ્ઞાન, પ્રમાણ નિરપેક્ષ જ્ઞાન, અન્તર્દષ્ટિ, અંતર્ગાન, સહજ જ્ઞાન. પશ્ચિમી વિશ્વ અને આધુનિક કાળમાં હેલમોન્ટને આ મુદ્દે સલામ મારવાનું એટલે થાય કે એમણે એવું કશું છે એ ઓળખી કાઢ્યું, તેનું લૉકેશન આશરે એમણે પકડ્યું. ગટ ફીલિંગ ૯૯% સંસાર સંબંધિત હોય છે. પોતાની આગવી શક્તિ સાથે એ ઇમોશન પ્રગટે છે, છતાં સૂક્ષ્મ હોય છે એટલે જો મન શાંત અને તટસ્થ ના હોય તો તેની સાથે કનેક્ટ ના થઈ શકાય એવું બને. સાધારણ અક્કલ, માહિતી અને અનુભવ એવું કહે છે કે મગજ માથામાં છે એટલે તમામ વિચાર અને લાગણીનું કેન્દ્ર ત્યાં છે, પરંતુ અહીં આંતરડાંના એરિયાની વાત છે. જેમાં એક રીતે ખોરાક હોય અને બીજી રીતે મળ હોય.