હવાલા કૌભાંડ અને ઇલ્લિગલ કામ

સત્તાવાળાઓ જ્યારે આ વિદ્યાર્થીનાં ખાતાંમાં રોકડા ડૉલર્સ જમા થયા છે એવું જુએ ત્યારે એમને બે શંકા આવે છે. કાં તો આ વિદ્યાર્થીએ ઇલ્લિગલી અમેરિકામાં કામ કર્યું છે અથવા તો આ ડૉલર્સ હવાલા દ્વારા મોકલવામાં આવ્યા છે, આથી એ વિદ્યાર્થીના સ્ટુડન્ટ વિઝા રદ કરવામાં આવે છે

- ડો.સુધીર શાહ

દિવસે દિવસે અમેરિકાની યુનિવર્સિટીઓમાં ભણવા જતાં ભારતીય વિદ્યાર્થીઓની સંખ્યામાં વધારો થતો જાય છે. અમેરિકાનું સ્ટાન્ડર્ડ ભારત કરતાં ખૂબ જ ઊંચું છે. ત્યાં રહેવા-ખાવાનો અને પરચૂરણ ચીજોનો ખર્ચો ભારત કરતાં ખૂબ વધારે આવે છે. અમેરિકાનું ભણતર પણ ખૂબ મોંઘું છે. પરદેશી વિદ્યાર્થીએ તો અમેરિકાના વિદ્યાર્થીઓ કૉલેજમાં ભણવાની જે ટ્યુશન ફી આપે છે એનાથી લગભગ ત્રણ ગણી ફી આપવી પડે છે. આ કારણોસર અમેરિકામાં ભણવા જતાં વિદ્યાર્થીએ પુષ્કળ ખર્ચો કરવો પડે છે. આથી જ ભારતમાંથી અમેરિકાની યુનિવર્સિટીઓમાં ભણવા જતા વિદ્યાર્થીઓ, જેની છૂટ છે એ અઠવાડિયાના વીસ કલાક ‘ઓન કેમ્પ્સ' કામ કરવા ઇચ્છે. જેમને ઓન કેમ્પ્સ કામ ન મળે તેઓ ગેરકાયદેસર અમેરિકામાં રહેતાં સગાંવહાલાં, ઓળખીતાપાળખીતા આ સર્વેની મોટેલો, હોટેલો, ફાસ્ટ ફૂડ રેસ્ટોરાં, કન્વિયન્સ સ્ટોરો વગેરેમાં શનિ-રવિ, રજાના દિવસે તેમ જ સાંજના યુનિવર્સિટી છૂટી જાય પછી કાર્ય કરવા લલચાય છે.