વિઝા વિમર્શ,

ઇમરજન્સી એપોઇન્ટમેન્ટ

- ડો.સુધીર શાહ

‘શું વાત કરો છો? બી-૧/બી-૨ વિઝા મેળવવા માટે બાયોમેટ્રિક્સની તારીખ આવતા વર્ષના છેક નવમા મહિનામાં અને ઇન્ટરવ્યૂની તારીખ ૧૦મા મહિનામાં મળે છે. સર, એક કામ કરોને. પેલી ઇમરજન્સી ઍપૉઇન્ટમૅન્ટ લઈ લો.' મહેસાણાના મધુસૂદનભાઈએ આ કટારના લેખકને જણાવ્યું.

‘તમને એવી કઈ ઇમરજન્સી આવી પડી છે કે તમે ઇમરજન્સી ઍપૉઇન્ટમૅન્ટ માગી શકો?’ એડવોકેટ સુધીર શાહે એમના ક્લાયન્ટને પ્રશ્ન કર્યો.

‘એવી કોઈ ઇમરજન્સી નથી, પણ વિઝા માટે બાર તેર મહિના વાટ જોવી એના કરતાં ઇમરજન્સી ઍપૉઇન્ટમૅન્ટ લઈને તુરંત જ વિઝા મેળવી લેવા સારા.’

‘તમારે અમેરિકા શા માટે જવું છે? તુરંત જ અમેરિકા જવાની શું જરૂરિયાત છે?’

‘સાહેબ, અમે તો ત્યાં રહેતા અમારા થોડાં સગાંવહાલાં અને મિત્રોને મળવાની ઇચ્છા ધરાવીએ છીએ. સાથે-સાથે સ્ટેચ્યુ ઑફ લિબર્ટી અને અમેરિકાના બીજા જોવા જેવા સ્થળો જોવા અમેરિકા જવા ઇચ્છીએ છીએ.

ગમે ત્યારે જઈએ તો ચાલે. ઇન્ટરવ્યૂ માટે આટલો લાંબો સમય વાટ જોવી એના કરતાં ઇમરજન્સી ઍપૉઇન્ટમૅન્ટ માગી લઈને તુરંત જ દસ વર્ષના મલ્ટિએન્ટ્રી બી-૧/બી-૨ વિઝા મેળવી લીધા હોય એટલે નિરાંત.’

‘જુઓ મધુસૂદનભાઈ, તમે આમ કોઈ પણ જાતની ઇમરજન્સી વગર ઇમરજન્સી ઍપૉઇન્ટમૅન્ટ માંગી ન શકો.’