મંદિરમાં બંધ ભારતમાતાને આઝાદી ક્યારે?

સમગ્ર દેશમાં ભારત માતાનું એક માત્ર મંદિર ભાવનગરના મઢડા ગામે આવેલું છે. અફસોસની વાત એ છે કે આ મંદિર પર તિરંગો લહેરાવવો તો દૂર, તેને ગ્રામજનો માટે ખોલવામાં પણ નથી આવતું. આઝાદીનો અમૃત મહોત્સવ ઊજવાઈ રહ્યો છે ત્યારે આ મંદિરની ઉપેક્ષા અનેક સવાલો સર્જે છે.

- હેતલ રાવ

દેશમાં જ્યારે આઝાદીનો અમૃત મહોત્સ ઊજવાઈ રહ્યો હોય ત્યારે સ્વાભાવિક રીતે જ ભારતમાતાની યાદ આવી જાય, પરંતુ ભાવનગર જિલ્લાના મઢડા ગામે આવેલા દેશનાં ભારતમાતાના મંદિરે પહોંચીએ અને મંદિરના શિખરે તિરંગો લહેરાતો ન જોઈએ ત્યારે સવાલ થાય કે એકબાજુ હર ઘર તિરંગા અને બીજી બાજુ ભારતમાતાના મંદિર પર જ તિરંગો નહીં? આઝાદીની આ તે કેવી ઉજવણી..?

ભાવનગર જિલ્લાના સિહોરથી ૨૦ કિલોમીટર દૂર મઢડા ગામ છે, જ્યાં લગભગ ૧૦૦ વર્ષ કરતાં પણ વધુ જૂનું ભારતમાતાનું મંદિર આવેલું છે. આ સ્થળનો આઝાદીમાં પણ ઘણો મોટો ફાળો રહેલો છે. મંદિરના પટાંગણમાં બેસીને જ આઝાદી મેળવવા માટેની યોજનાઓ ઘડવામાં આવતી હતી. અહીં લોકોમાં રહેલી દેશદાઝને પ્રજ્વલિત કરવા સભાઓ સંબોધાતી હતી. મંદિરની સ્થાપના ૧૯૨૫માં કચ્છી જૈન શિવજીભાઈ દેવશીભાઈએ કરી હતી. હાલમાં તેમની ત્રીજી પેઢી મંદિરની સંભાળ લઈ રહી છે, પરંતુ સરકારની મદદ વિના આ જગ્યાનો અને મંદિરનો વિકાસ અટકી પડ્યો છે.

મંદિરના નિર્માણ સમયે મહાત્મા ગાંધી અને લોકમાન્ય તિલક મોખડકાથી ચાલીને મઢડા આવ્યા હતા. આઝાદીના સંઘર્ષકાળ દરમિયાન આ ભારતમંદિરની જાહોજલાલી અદ્ભુત હતી. મંદિરમાં સ્થાપિત કરવામાં આવેલી ભારતમાતાની મૂર્તિ અખંડ પથ્થરમાંથી બનેલી છે. એટલે કે છ ફૂટ લાંબી મૂર્તિનું નિર્માણ એક જ પથ્થરમાંથી કરવામાં આવ્યું છે. આઝાદી પહેલાં જ આ ગામમાં મંદિર બનાવીને ભારતની આઝાદી પાકી કરી લેવામાં આવી હતી, પરંતુ આજે અફસોસ એ વાતનો છે કે આ મંદિરની અંદર જવાની પણ કોઈને પરવાનગી નથી.