વિશ ઓલ ઓફ યુ-હેપ્પી ફ્રેન્ડશિપ ડે!

આટલું પૂછીને બબિતા ટેન્શનમાં આવી ગઈ કે મેં તો છેલ્લા ઘણા સમયથી આમને હેરાન કરવાનું બંધ કર્યું છે, તો એમના જીવનમાં બીજું કોણ આવ્યું હશે?

- હર્ષદ પંડ્યા ‘શબ્દપ્રીત’

જીવનમાં ભલે વાઇફ એક જ હોય, પણ મિત્રો તો બેચાર હોવા જ જોઈએ, આફ્ટર મૅરેજ જો હળવાફૂલ થઈને જીવવું હોય તો!

મિત્રોનું પણ એક વિશ્વ હોય છે. કહેવાય છે કે એક સાચો મિત્ર પરણેલી વ્યક્તિનો રાહબર બની શકે છે, જો એ મિત્ર સેન્ટ પર સેન્ટ કુંવારો હોય, તો! મૈત્રીશાસ્ત્રમાં આવા કુંવારા મિત્રને જ ‘સાચા મિત્ર’ તરીકે પુરસ્કૃત કરવામાં આવ્યો છે. હવે પછી કોઈ એમ બોલે કે, ‘ફલાણા ભાઈ મારા સાચા મિત્ર છે,’ તો સમજી લેવાનું કે, એ ફલાણા ભાઈ સેન્ટ પર સેન્ટ કુંવારા છે!

અમેરિકાના વિખ્યાત હાસ્યલેખક માર્ક ટ્વેઇને તેના ‘યંગ ટૉમ સૉયર’ નામના પુસ્તકમાં મિત્રની વ્યાખ્યા સમજાવતાં લખ્યું છેઃ The person who can easily read your eyes, is your friend.

ભરતમુનિએ તેમના નાટ્યશાસ્ત્રના પૃષ્ઠ-૧૭માં લખ્યું છેઃ ‘દૂર રહેલા મનુષ્ય સાથે વાત કરવી હોય તો શિરસ્થાનથી સ્વર કાઢવો જોઈએ. બહુ દૂર ન હોય તો કંઠસ્થાન અને બાજુમાં હોય તો ઉર એટલે કે છાતીમાંથી સ્વર કાઢવો જોઈએ. ભરતમુનિની ક્ષમાયાચના સાથે અમે સૌ વાચકોને ‘મનુષ્ય’ની જગાએ ‘મિત્ર’ વાંચવાની વિનંતી કરીએ છીએ.

આ સંદર્ભે બાબુ બૉસની દલીલ એવી છે કે મિત્ર હૃદયમાં જ બેઠો હોય તો એની સાથે વાત કેવી રીતે કરવી? બાબુ કોઈ નેતા કે સરકારી બાબુ નથી તેમ છતાં એને બેબુનિયાદ શંકા-કુશંકા પેદા કરવાનો અને ઉત્તર વગરના પ્રશ્નો પેદા કરવાનો નાનપણથી શોખ.

બાબુના આવા લા-જવાબ સવાલનો જવાબ આપતાં અમે એટલું જરૂર કહી શકીએ કે મિત્ર હૃદયમાં જ બેઠો હોય તો પછી એની સાથે વાત કરવા માટે કોઈ જાતના સ્વર કે વ્યંજન, મતલબ કે અવાજના ઓશિયાળા બનવાની જરૂર જ ક્યાં છે? એ તો આપણો શ્વાસ સાંભળીને જ બધું સમજી જતો હોય! સાચા મિત્રની સાચી ઓળખ આપતાં કોઈ મૈત્રીપ્રેમીએ ખૂબ જ ખૂબસૂરત લખ્યું છે –

‘આંસુઓમાં પડે પ્રતિબિંબ એવા દર્પણ ક્યાંથી હોય, કહ્યા વિના ય સઘળું સમજે એવા સગપણ ક્યાંથી હોય!'