ജിയോ, മ്യൂച്വൽ ഫണ്ടിൽ എന്തു മാറ്റം കൊണ്ടുവരും?

റിലയൻസിന്റെ 25 കോടിയും ജിയോയുടെ 44 കോടിയും വരുന്ന ഡേറ്റാ ഉപയോക്താക്കളുടെ ബേസിലേക്ക് ഡിജിറ്റലായും 18,500ൽ അധികം സ്റ്റോറുകളിലൂടെയും ഇറങ്ങിച്ചെന്ന് വിപണി പിടിക്കാനുള്ള ജിയോ തന്ത്രം മ്യൂച്വൽ ഫണ്ടിനെ എത്രത്തോളം സാധാരണക്കാരിലേക്ക് എത്തിക്കുമെന്നതാണ് അറിയേണ്ടത്.

കുറച്ചു വർഷങ്ങൾക്ക് അപ്പുറം ടെലികോം മേഖലയിൽ ജിയോ വരുത്തിയ മാറ്റം ഓർമയുണ്ടോ? വിപ്ലവകരമായ ആ പരിഷ്കാരങ്ങൾക്ക് ഒടുവിൽ 40 ശതമാനത്തിന്റെ മാർക്കറ്റ് ഷെയറും ഒന്നാം സ്ഥാനവും ജിയോ പിടിച്ചടക്കി. രാജ്യത്തിന്റെ ഡിജിറ്റൽ കുതിപ്പിന് വേഗം വർധിപ്പിക്കാൻ ഉതകിയ മാറ്റം കൂടിയായിരുന്നു അത്.

ഇനി ജിയോ ഫിനാൻഷ്യൽ സർവീസസിന്റെ ഊഴമാണ്. റിലയൻസിൽനിന്ന് അടർന്നു മാറിയ കമ്പനി ഓഹരിവിപണിയിൽ ലിസ്റ്റ് ചെയ്തു കഴിഞ്ഞു. ഇന്ത്യ ഇതുവരെ കണ്ടിട്ടില്ലാത്ത വളർച്ച വേഗം കൈവരിക്കാൻ കഴിയുമെന്നാണ് ലിസ്റ്റിംഗ് വേളയിൽ ജിയോ ഫിനാൻഷ്യൽ സർവീസസ് ചെയർമാൻ കെ.വി. കാമത്ത് പറഞ്ഞത്. അടുത്ത എട്ടു വർഷത്തിനുള്ളിൽ രാജ്യത്തിന്റെ ജിഡിപി ഇരട്ടിയാകും. അത് സമ്മാനിക്കുന്ന അവസരങ്ങൾ വലുതാണ്. അതുകൊണ്ടുതന്നെ ഒരു സമ്പൂർണ്ണ സാമ്പത്തിക സേവനദാതാവാകുകയാണ് തങ്ങളുടെ ലക്ഷ്യമെന്നും കാമത്ത് വ്യക്തമാക്കിയിരുന്നു.