പ്രിയപ്പെട്ട ഒരാൾ

‘സംവിധാനജീവിതത്തിലെ നിർണായക ഘട്ടമായിരുന്നു അത്. ശ്രീനിയുടെ സഹായത്തോടെ ഞാനത് അതിജീവിച്ചു പ്രിയദർശൻ പറയുന്നു

സിനിമ സംവിധാനം ചെയ്യാൻ എനിക്ക് അവസരം കൈവന്നപ്പോൾ ആദ്യസിനിമയിൽ ശ്രീനി അഭിനയിക്കണമെന്ന് ഞാൻ തീരുമാനിച്ചു. പൂച്ചയ്ക്കൊരു മൂക്കുത്തിയുടെ കഥ കേട്ടു കഴിഞ്ഞ് ആ പ്രോജക്ടിനെ ഏറ്റവുമധികം പ്രോത്സാഹിപ്പിച്ചത് ശ്രീനിയാണ്. കഥാഗതിയിൽ വന്നുകൊണ്ടിരുന്ന കുരുക്കും കുരുക്കഴിക്കലുമാണ് ശ്രീനിയെ ഏറെ ആകർഷിച്ചത്. ഈ സങ്കേതം പില്ക്കാല സിനിമകളിൽ എനിക്ക് പ്രയോഗിക്കാനുള്ള കരുത്ത് ലഭിച്ചത് ശ്രീനിയുടെ പ്രോത്സാഹനത്തിൽനിന്നാണ്.

ആദ്യസിനിമകഴിഞ്ഞ ശേഷം വീണ്ടുമൊരു സിനിമയ്ക്കായി എന്റെ കൈയിലൊന്നുമില്ലെന്ന യാഥാർഥ്യം ഒരു നീറ്റലോടെ എനിക്ക് ബോധ്യമായി. ഏതൊരു ചലച്ചിത്രകാരന്റെയും ജീവിതത്തിലെ നിർണായകഘട്ടമാണ് അയാളുടെ രണ്ടാം സിനിമ. എന്തുചെയ്യണമെന്നറിയാതെ ഞാൻ മദ്രാസിലെത്തി. കഥയില്ല. മനസ്സ് ശൂന്യം. ഒടുവിൽ കുറെ സിനിമകളുടെ കാസെറ്റ് സംഘടിപ്പിച്ച് കണ്ടു. അവയിൽ നിന്നും കുറെ സീനുകൾ മോഷ്ടിച്ചു. എനിക്ക് എന്നോടുതന്നെ കലിതോന്നി. ജോഷിക്കും ഐ.വി. ശശിക്കുമൊക്കെ കഥയെഴുതിക്കൊടുക്കാൻ ആളുണ്ട്. എനിക്ക് കഥയെഴുതി തരാൻ തിരക്കഥാകൃത്തുക്കളില്ല. പക്ഷേ രണ്ടാമത്തെ സിനിമ ചെയ്തില്ലെങ്കിൽ എന്റെ ചലച്ചിത്ര ജീവിതത്തിന് തിരശീല വീഴും.