കഥാപാത്രങ്ങളുടെ ശക്തിയേക്കാൾ ഉപരിയാണ് ബന്ധങ്ങൾ - ഇന്ദ്രൻസ്

ഒന്നിനും പരിഭവങ്ങൾ പറയാത്ത ഒരാളാണ് നടൻ ഇന്ദ്രൻസ്. എന്തിനോടും ഏതിനോടും സൗമ്യമായി സമീപിക്കുന്ന ഒരാൾ. മനസ്സിനുള്ളിൽ പരാതികളുണ്ടെങ്കിലും ചിരിയിൽ പൊതിഞ്ഞുള്ള പ്രതികരണവും ശബ്ദവുമാണ് പതിവ്.

- ജി. കൃഷ്ണൻ

ഇക്കുറി സംസ്ഥാന അവാർഡ് പ്രഖ്യാപിക്കുമ്പോൾ ഇന്ദ്രൻസ് പ്രധാന വേഷം ചെയ്ത് കുടുംബസദസ്സുകൾ ഏറ്റു വാങ്ങിയ "ഹോം' എന്ന സിനിമയ്ക്ക് ഒരവാർഡു പോലും ലഭിച്ചിരുന്നില്ല. തനിക്കെന്നല്ല, ഹോം സിനിമയുടെ ഏതെങ്കിലും ഒരു വിഭാഗത്തിന് ഒരവാർഡെങ്കിലും കിട്ടുമെന്ന് പ്രതീക്ഷയുണ്ടായിരുന്നുവെന്നും ഒന്നും കിട്ടാതെ വന്നപ്പോൾ ജൂറി ആ സിനിമ കണ്ടിട്ടുണ്ടാവില്ലെന്നുമായിരുന്നു ഇന്ദ്രൻസിന്റെ പ്രതികരണം. ആ ഭാഷയ്ക്കും വാക്കുകൾക്കും ശക്തിയുണ്ടായിരുന്നുവെങ്കിലും വർത്തമാനശൈലിയുടെ ഭാവം സൗമ്യത തന്നെയായിരുന്നു. നിഷ്കളങ്കതയുടെ ആവരണം പൊതിഞ്ഞു കൊണ്ടുള്ള ആ വർത്തമാനം ചില ചാനലുകൾക്കു മുമ്പിൽ ഇന്ദ്രൻസ് തുറന്നു വിട്ടു. താണസ്വരമെങ്കിലും അത് എത്തെണ്ടിടത്ത് എല്ലാം എത്തിയിരുന്നു.

കോന്നിയിൽ "ലൂയിസ്' എന്ന സിനിമ യുടെ ലൊക്കേഷനിൽ വച്ച് ഇന്ദ്രൻസ് "നാന'യോട് സംസാരിക്കുമ്പോഴും ഈ കലാകാരന് ഏറെ രോഷാകുലനാകാനൊന്നും കഴിഞ്ഞില്ല.

“ഹോം' സിനിമയിലെ താങ്കളുടെ ഒലിവർ ട്വിസ്റ്റ് എന്ന കഥാപാത്രം അതു വരെ ചെയ്തിട്ടുള്ളതിൽ നിന്നും വ്യത്യസ്തമായിരുന്നല്ലോ. അതിനുശേഷമുള്ള താങ്കളുടെ അഭിനയജീവിതത്തിലെ പരിവർത്തനത്തെക്കുറിച്ച് പറയാമോ?

പരിവർത്തനം ഉണ്ടായോ എന്നെനിക്കറിയില്ല. പക്ഷേ, സിനിമയിൽ വലിയ വേഷങ്ങൾ ചെയ്യാൻ എന്നെ വിളിക്കു ന്നവരുടെ എണ്ണം കൂടിയിട്ടുണ്ട്. അതാണ് ഞാൻ കാണുന്ന ഒരു പരിവർത്തനം.

ആ രീതിയിൽ വരുന്ന കഥാപാത്രങ്ങൾ എങ്ങനെ ഏത് രീതിയിലാണ് താങ്കൾ തെരഞ്ഞടുക്കുന്നത്?

തെരഞ്ഞെടുക്കലൊക്കെ പഴയ രീതി തന്നെ. കഥയും കഥാപാത്രവും ഒക്കെ നല്ലതാണോ, ശക്തമാണോ എന്നെല്ലാം നോക്കുന്നതിലും ഉപരി ബന്ധങ്ങൾക്കാണ് വില കൊടുക്കുന്നത്. പിന്നെ, നല്ല മാറ്റങ്ങൾ വരുത്തിക്കൊണ്ട് പുതിയവരൊക്കെ ചെയ്യുന്ന പല സിനിമകളും നല്ലതാണ്. അത് കാണുമ്പോൾ ഉത്സാഹം കൂടും. നല്ല കഥ കേൾക്കുമ്പോൾ അത് എത്രയും പെട്ടെന്ന് ചെയ്യണമെന്ന് തോന്നും.

ഇപ്പോൾ അധികവും നായക കഥാപാത്രങ്ങളായി അഭിനയിക്കാനുള്ള വേഷങ്ങളല്ലേ ലഭിക്കുന്നത്?

എല്ലാം അങ്ങനെയെങ്കിലും കിട്ടുന്നതിൽ മിക്കതിനും നീളം കൂടും. അപ്പോൾ കൂടുതൽ ദിവസങ്ങൾ ഷൂട്ടിംഗിനായി നൽകേണ്ടി വരും.

ചെറിയ വേഷങ്ങളിലേക്ക് വിളിച്ചാൽ ആ റോൾ ചെയ്യാൻ തയ്യാറാകുന്നുണ്ടോ?