തിരുവനന്തപുരത്തെ ശംഖുമുഖം കടപ്പുറത്തെ സൂര്യാസ്തമയക്കാഴ്ചകളിലെ വിശേഷങ്ങളിലൂടെ

സൂര്യാസ്തമയം കാണാനായി ഞങ്ങൾ കടപ്പുറത്തെ വലിയ പാറകളിൽ സമയം ചിലവഴിച്ചതും മാനം ചുവന്ന് വന്നതും ആകാശത്തെ ചുവപ്പ് പടർന്നപ്പോൾ പന്ത് പോലെ ചുവന്ന് തുടുത്ത സുര്യന്റെ പ്രയാണവും അതിൽ ലയിച്ചിരിക്കുന്ന ജനങ്ങളുടെ പ്രവാഹവും ഞങ്ങളെ അത്ഭുതപ്പെടുത്തി.

- ഡോ. പി. കെ. ജയകുമാരി

തിരുവനന്തപുരത്തെ ശംഖുമുഖം കടപ്പുറത്ത് കുട്ടികളായ ഞങ്ങളെ ഏറെ ആകർഷിച്ചത് അവിടെയുള്ള ചെറിയ ചെറിയ കടകളിൽ നിറയെ തൂക്കിയിട്ടിരുന്ന പലതരത്തിലും നിറത്തിലും ആകൃതിയിലുമുള്ള കല്ലുമാലകളും വളകളുമായിരുന്നു. വിദേശരാജ്യങ്ങൾ സന്ദർശിച്ചിട്ടുണ്ടെങ്കിൽ പോലും അത്രയ്ക്ക് മനോഹരമായ ചിപ്പിയും മുത്തും നൂലിൽ കോർത്ത ആഭരണങ്ങൾ കാണുവാനായിട്ടില്ല. കുഞ്ഞുമനസ്സിലേ ഭാവനകളിൽ നിറം പകർന്ന സൗന്ദര്യലഹരി ആസ്വദിച്ചതിനാലാണോ അതോ കലാകാരന്മാരുടെ കൈവിരുതിന്റെ മാന്ത്രികശക്തിയാണോ എന്നറിയില്ല, ഈ ഭൂതകാലസ്മരണകൾ ഇന്നും ആസ്വാദ്യമാണ്.

ശംഖുപുഷ്പത്തിന്റെയോ മഷിയുടെയോ കടും നീലനിറത്തിലെ മുത്തുകളും വെള്ളയും റോസ് നിറത്തിലേയും മുത്തുകളിൽ നിറയെ കറുപ്പും വെളുപ്പും ചേർന്ന സീബ്രാലൈനുകൾ പോലെ മുത്തുകളുടെ വലിപ്പത്തിനനുസരിച്ച് ക്രമാതീതമായി കോർത്തിണക്കിയിരുന്ന മാലകളുടേയും  വളകളുടേയും ഭംഗി ഇന്നും മനസ്സിലിട്ട് താലോലിക്കാറുണ്ട്. തനി നാടൻ ശൈലിയിൽ തീർത്ത വിലകുറഞ്ഞ ആഭരണങ്ങളിലൂടെ കലാകാരന്മാർ അവരുടെ മികവ് പ്രകടമാക്കിയിരുന്നു. കലാകാരന്മാരിലെ ദൈവീകത്വമാണ് അവരുടെ സൃഷ്ടികളിലൂടെ നമുക്ക് ആസ്വദിക്കാനാവുന്നത് വളരെ അർത്ഥവത്താണ്.

അമ്മ കൈ നിറയെ മാലകളും വളകളും വാങ്ങിയപ്പോൾ അതൊക്കെ ഞങ്ങൾക്കാണെന്ന് മനസ്സിലാക്കിയ സന്തോഷതിമർപ്പിൽ കടപ്പുറത്തെ മണലിലൂടെ ഞങ്ങൾ കുട്ടികൾ മാതാപിതാക്കളുടെ മുന്നിൽ ഓടിക്കളിക്കുകയായിരുന്നു. ചേച്ചിയും ചേട്ടന്മാരും മുത്തുച്ചിപ്പികളിൽ തീർത്ത പേനയും കീചെയിനും വാങ്ങുന്നതിൽ ശ്രദ്ധ കേന്ദ്രീകരിച്ചപ്പോൾ അച്ഛൻ വീട്ടിലെ ഓഫിസ് മുറിയിൽ വെക്കാവുന്ന കൗതുകമുള്ള ആഷ് ട്രേയും തലസ്ഥാനനഗരിയേക്കുറിച്ചുള്ള പുസത്കങ്ങളും ആൽബവും വാങ്ങിച്ചു. ചെറിയചേട്ടന് ഫിഷ് ടാങ്ക് അലങ്കരിക്കാവുന്ന ഭംഗിയേറിയ ശംഖുകളും ചിപ്പികളും ശംഖുകളും വാങ്ങിച്ചു.