വർഷങ്ങളിൽ പൊഴിയാതെ ജയൻ

ഓർമ മലയാളിയുടെ മനസ്സിൽ ജയൻ അനശ്വരനായിട്ട് നവംബർ 16 നു 40 വർഷം. മരിക്കാത്ത ഓർമകളാണ് ജയനെക്കുറിച്ച് ഉറ്റവർക്കും ആരാധകർക്കും. ജയൻ ജനിച്ചുവളർന്ന ഓലയിൽ ഗ്രാമത്തിലൂടെ ഒരു യാത്ര

വി.ആർ. ജ്യോതിഷ്

കൊല്ലം കുമാർ തിയറ്ററിന്റെ നയനമനോഹരമായ വെള്ളിത്തിരയിൽ ഇന്ന് രണ്ടു മുപ്പതിനുള്ള മാറ്റിനി ഷോയോടുകൂടി പ്രദർശനം ആരംഭിക്കുന്നു; "ശാപമോക്ഷം. ' ഓലയിൽ നിവാസികൾക്ക് പ്രിയപ്പെട്ട പൊന്നച്ചംവീട്ടിലെ സത്രം മാധവൻ പിള്ളയുടെയും ഭാരതിയമ്മയുടെയും മകൻ ബേബിയെന്നു നമ്മൾ വിളിക്കുന്ന ശീമാൻ കൃഷ്ണൻ നായർ ഈ സിനിമയിൽ അഭിനയിക്കുന്നു. '

കാളവണ്ടിയിൽ സിനിമാ പോസ്റ്ററുകൾ കൊണ്ട് അലങ്കരിച്ച്, ചെണ്ട കൊട്ടി സിനിമയുടെ പരസ്യപ്രചാരണം പൊടിപൊടിക്കുകയാണ്. ഓലയിൽ ഗ്രാമത്തിലുള്ളവർ അത്ഭുതത്തോടെയും അഭിമാനത്തോടെയും ഇതു കേട്ടു നിന്നു. പിന്നെ, നാൽക്കവലയിലും ചായക്കടയിലും ഇരുന്ന് അവർക്കു പ്രിയപ്പെട്ട കൃഷ്ണൻനായരെക്കുറിച്ചു സംസാരിച്ചു.

46 വർഷം മുൻപ് നടന്ന ഈ പരസ്യത്തിനു ശേഷമുള്ള ആറുവർഷം കൃഷ്ണൻ നായരെ ചുറ്റിപ്പറ്റിയായിരുന്നു മലയാള സിനിമയുടെ യാത്ര. ജയൻ എന്ന കാൽപനിക നാമത്തിൽ കൃഷ്ണൻനായർ നക്ഷത്രമായി. രാത്രിയെന്നോ പകലെന്നോ ഇല്ലാതെ ഒറ്റ ഡയലോഗ് കൊണ്ട് തിയറ്റർ ഇളക്കിമറിക്കുന്ന താരസൂര്യനായി.

"ശാപമോക്ഷ'ത്തിൽ ഉദിച്ച് "കോളിളക്ക'ത്തിൽ അസ്തമിച്ചു പോയ അതുല്യനടൻ. എങ്കിലും കൊല്ലം ജില്ലയിലെ ഓലയിൽ ഗ്രാമത്തിൽ ഇപ്പോഴും ജയന്റെ ഓർമകൾക്ക് നാട്ടുപുലരിയുടെ തെളിച്ചം. തിരുവിതാംകൂർ കൊട്ടാരത്തിന്റെ ഉടമസ്ഥതയിലുള്ള സത്രത്തിന്റെ സൂക്ഷിപ്പുകാരനായിരുന്നു ജയന്റെ അച്ഛൻ മാധവൻപിള്ള. അങ്ങനെ അദ്ദേഹത്തിന്റെ വിളിപ്പേര് സത്രം മാധവൻപിള്ള എന്നായി. മാധവൻപിള്ളയ്ക്കും ഭാരതിയമ്മയ്ക്കും മക്കളുണ്ടാകാൻ വൈകി. അങ്ങനെ അവർ ഒരു ജ്യോത്സ്യനെ കണ്ടു. ആൽമരത്തിന്റെ തെയും ആര്യവേപ്പിന്റെ തെയും കൂട്ടിക്കെട്ടി നട്ടുവളർത്താനായിരുന്നു ജ്യോത്സ്യന്റെ ഉപദേശം. മാധവൻ പിള്ള അങ്ങനെ ചെയ്തു.

മകൻ പിറന്നപ്പോൾ ആലിലയിൽ പള്ളികൊള്ളുന്ന ഉണ്ണിക്കണ്ണനോടുള്ള ഭക്തിയിൽ ചാലിച്ച് മാധവൻ പിള്ള "കൃഷ്ണൻ' എന്നു പേരിട്ടു. വാമൊഴിയായി പ്രചരിച്ച ഈ കഥയിലെ സത്യം എത്രയെന്ന് നിശ്ചയമില്ല. എങ്കിലും കാലത്തിനൊപ്പം വളർന്ന ആ ഇലത്തഴപ്പ് ഇന്നും കാണാം, കൊല്ലത്തെ പൊലീസ് മ്യൂസിയം വളപ്പിൽ.

ആലും വേപ്പും ഒരുമിച്ച് വളർന്നു വലുതായി നിൽക്കുന്നു അവിടെ. ആ മരങ്ങളെ നോക്കി നിൽക്കുമ്പോൾ ഓർമയുടെ കാറ്റിൽ "ജയൻ ' ഇളകി. മനസ്സിൽ നിറയുന്നത് ആൺകരുത്തിന്റെ ആൾരൂപമായ ആ മുഖവും രൂപഭംഗിയും.

വെണ്ണയുണ്ട് വളർന്ന കൃഷ്ണൻ

മാധവൻ പിള്ളയുടെ മരണശേഷം കുടുംബം കടുത്ത ദാരിദ്യത്തിലായിരുന്നു. പശുവിനെ വളർത്തിയും മറ്റുമാണ് അമ്മ മക്കളെ വളർത്തിയത്. പശുവിനെ വളർത്തുന്നതിൽ അമ്മയ്ക്ക് മറ്റൊരു ഉദ്ദേശവുമുണ്ടായിരുന്നു. മക്കൾക്ക് പാലും വെണ്ണയും കൊടുക്കുക. പ്രൈമറിക്ലാസിൽ പഠിക്കുമ്പോൾ അമ്മ ജയ നോടു പറയും; “നീ ഹൈസ്കൂൾ ജംക്ഷൻ വരെ ഓടിയിട്ടു വാ.' ഓടി വരുമ്പോൾ അമ്മ വെണ്ണ കൊടുക്കും.