മധുരം ചോരാത ജീവിതം മുന്നോട്ട്

പ്രമേഹരോഗികൾ ഭക്ഷണക്കാര്യത്തിൽ ശ്രദ്ധിക്കേണ്ടത് എന്തൊക്കെ എന്നറിയാം. ഒപ്പം പ്രമേഹമുള്ളവർക്ക് കഴിക്കാൻ പറ്റിയ വ്യത്യസ്ത വിഭവങ്ങളും ഡയറ്റ് പ്ലാനും പാചകക്കുറിപ്പുകളും.

Rekha Nambiar

കണ്ണില്ലാത്തവർക്കേ കണ്ണിന്റെ വിലയറിയു എന്ന് പറയാറുണ്ട്. അതുപോലെയാണ് പ്രമേഹ രോഗികളുടെ ഭക്ഷണക്കാര്യം. പാലടയും പാൽപ്പേടയുമൊക്കെ മൂക്കുമുട്ടെ തട്ടിവിടുന്ന ഭക്ഷണപ്രേമി, പെട്ടെന്നൊരു സുപ്രഭാതത്തിൽ താൻ പ്രമേഹരോഗിയാണെന്ന് തിരിച്ചറിയുമ്പോൾ ആ വ്യക്തിക്ക് നഷ്ടമാകുന്നത് രുചിയുടെ വലിയലോകം കൂടിയാണ്. അത് കഴിക്കരുത്, ഇത് കഴിക്കരുത് എന്നു പറഞ്ഞ് കുടുംബവും കൂട്ടുകാരും വിലക്കുകളുമായി പിന്നാലെ കൂടുകയും ചെയ്യും. ഇവർക്ക് എരിവും പുളിയും ചവർപ്പുമുള്ള വിഭവങ്ങളൊക്കെ കഴിക്കാം. പക്ഷേ, കൂട്ടത്തിലെ കേമനായ മധുരത്തിന് ഇലയ്ക്ക് പുറത്താണ് സ്ഥാനം. ജീവിതക്രമം ഒന്നു ചിട്ടപ്പെടുത്തിയാൽ രുചികളിലൊന്നിനോടും വിവേചനമില്ലാതെ ഏതു പ്രമേഹരോഗിക്കും എന്തും കഴിക്കാം.

കുറച്ചുമുമ്പ് വരെ ടൈപ്പ് 1, ടൈപ്പ് 2 എന്നീ രണ്ട് തരത്തിലുള്ള പ്രമേഹം മാത്രമേ ഉണ്ടായിരുന്നുള്ളൂ. ഇപ്പോൾ ജനിതകപരമായും പാരമ്പര്യമായുമൊക്കെ പലതരത്തിൽ പ്രമേഹം പിടികൂടുന്നുണ്ട്. നവജാതശിശുക്കളിൽ കണ്ടുവരുന്ന നിയോനേറ്റൽ ഡയബെറ്റിസ് മുതൽ മോഡി (മെച്ചുരിറ്റി ഓൺസെറ്റ് ഡയബെറ്റിസ് ഓഫ് ദി യങ്-MODY), ലാഡ ഡയബറ്റിസ് എന്നിങ്ങനെ...20 വയസ്സിന് താഴെ പ്രായമുള്ളവരിലുണ്ടാകുന്ന പ്രമേഹരോഗത്തെയാണ് ടൈപ്പ് 1 എന്നു പറയുന്നത്. 30 വയസ്സിനു മുകളിൽ പ്രായമുള്ളവർക്ക് പ്രമേഹമുണ്ടെങ്കിൽ അത് ടെപ്പ് 2 എന്നും അറിയപ്പെടുന്നു. എന്നാലിപ്പോൾ 20 വയസ്സിൽ പോലും ടൈപ്പ് 2 പ്രമേഹം സാധാരണമാവുകയാണ്.

നമ്മുടെ ജീവിതശൈലി തന്നെയാണ് പ്രധാന വില്ലൻ. അരക്കിലോമീറ്ററിനടുത്തുള്ള കടയിൽ പോകുമ്പോൾ പോലും ബൈക്കില്ലാതെ പറ്റില്ല. മണിക്കൂറുകളോളം ഫോണും നോക്കിയുള്ള കുത്തിയിരിപ്പും. തകിടം മറിഞ്ഞ ദിനചര്യകളെ ശരിയാക്കിയെടുത്താൽ തന്നെ ആരോഗ്യം തിരിച്ചുപിടിക്കാനാവും.

ഇപ്പോൾ പ്രമേഹമില്ലാത്തവരേക്കാളും കൂടുതൽ കാലം ജീവിക്കുന്നത് നിയന്ത്രിതമായ പ്രമേഹ രോഗമുള്ളവരാണത്രെ. അവർ കൃത്യമായ ജീവിതശൈലി പിന്തുടരുന്നതു തന്നെയാണ് കാരണം. എന്താണ് നല്ലത്, ചീത്ത എന്ന് അവർക്കറിയാം. ഒരുദിവസം പോലും വ്യായാമത്തിലും വിട്ടുവീഴ്ച കാണിക്കില്ല. നേരത്തും കാലത്തും മരുന്നുകൾ കഴിക്കും.

കൊളസ്ട്രോളും രക്തസമ്മർദവുമൊക്കെ കൃത്യമായ ഇടവേളകളിൽ ഇവർ പരിശോധിക്കും. മിക്ക ആരോഗ്യപ്രശ്നങ്ങളും നേരത്തെ കണ്ടെത്തി അസുഖങ്ങളിൽ നിന്ന് മോചിതരാവുന്നു. മറ്റുളളവരാവട്ടെ ആരോഗ്യം ശ്രദ്ധിക്കാതെ, യാതൊരു ഭക്ഷണനിയന്ത്രണങ്ങളും വ്യായാമവും ഇല്ലാതെ ഒരേ രീതിയിൽ ജീവിതം മുന്നോട്ടു കൊണ്ടുപോവും. ഇക്കൂട്ടർക്ക് അസുഖം വരുമ്പോഴേക്കും വളരെ വൈകിപ്പോയേക്കാം.

ഒഴിവാക്കേണ്ടതും ഉൾപ്പെടുത്തേണ്ടതും

ഒരാളുടെ ഭക്ഷണരീതിയിലെ അപാകതകൊണ്ടുമാത്രം പ്രമേഹം അയാളെ പിടികൂടാം. അതേ ഭക്ഷണരീതിയിൽ മാറ്റം വരുത്തിയാൽ പ്രമേഹത്തെ അകറ്റാനുമാവുമെന്നാണ് വിദഗ്ധരുടെ കണ്ടെത്തൽ. പലരും ഡയറ്റിൽ നിന്ന് മധുരത്തെ അകറ്റും, അരി ഭക്ഷണവും ഒഴിവാക്കും. പക്ഷേ, പകരം എന്തൊക്കെ ഉൾപ്പെടുത്തണമെന്നോ എത്ര അളവിൽ ഏതൊക്കെ നേരത്ത് കഴിക്കണമെന്നാ നിശ്ചയമുണ്ടാവില്ല. ബേക്കറിപ്പലഹാരങ്ങൾ, മധുരം ധാരാളമടങ്ങിയ ആഹാരങ്ങൾ (ലഡു, ജിലേബി പോലുള്ളവ, കോളാ പാനീയങ്ങൾ, ഊർജം കൂടുതലടങ്ങിയ ഭക്ഷണങ്ങൾ, കൊഴുപ്പ് കൂടുതലടങ്ങിയ ഭക്ഷണങ്ങൾ, മെദപോലെ സംസ്കരിച്ചെടുത്ത ഭക്ഷണങ്ങൾ എന്നിവയെല്ലാം തന്നെ പ്രമേഹത്തിന് കാരണമാകാം.