నారీ సాధికారతకు సైరీ

సాధికారతవైపు మహిళలు ఎన్ని అడుగులు వేస్తున్నా, ఉద్యోగంవైపు మాత్రం తక్కువే పడుతున్నాయి. ఒకవేళ తమకు నచ్చిన, తాము మెచ్చిన నౌకరీ దొరికినా, నిత్యం అనేక సమస్యలు మగువలను వెంటాడుతున్నాయి. మధ్య వయస్సుకు వచ్చేసరికి, కొలువు కన్నా ఇతర అంశాలు ముందు వరుసలోకి వచ్చి చేరుతున్నాయి. ఓవైపు ఎదుగుతున్న పిల్లలు, వారి చదువులు, ఆర్థిక వ్యవహారాలు.. మరోవైపు ఉద్యోగ బాధ్యతలు, ఇంటి పనులు వారిని ఉక్కిరిబిక్కిరి చేస్తున్నాయి. ఫలితంగా, రిటైర్‌ అయ్యేదాకా ఉద్యోగం చేయలేక మధ్యలోనే విరమిస్తున్న వనితలు ఎందరో! ఇలాంటి వారికి అండగా ఉంటున్నది ‘షీరోస్‌.ఇన్‌'. దీని వెనుక ఉన్నది ‘సైరీ చాహల్‌'.

ఉత్తరప్రదేశ్‌లోని ముజఫ్ఫర్‌నగర్‌లో ఓ మధ్యతరగతి కుటుంబంలో పుట్టింది సైరీ చాహల్‌. బాల్యం నుండే పుస్తకాలపై మమకారం పెంచుకుంది. పదేండ్లకే ఎన్నో గొప్ప రచనలను చదివింది. ఢిల్లీలోని జవహర్‌లాల్‌ నెహ్రూ విశ్వవిద్యాలయంలో (జేఎన్‌యూ)లో చేరింది. రష్యన్‌ భాషాశాస్త్రంలో మాస్టర్స్‌తోపాటు అంతర్జాతీయ దౌత్య సంబంధాలపై ఎంఫిల్‌ చేసింది.

దశ మార్చిన సోవియట్‌ పతనం

అది 1991వ సంవత్సరం. ఏదో ఒక విద్యాసంస్థలో అధ్యాపకురాలిగా చేరుదామనుకున్నది సైరీ. అదే సమయంలో ‘సోవియట్‌ యూనియన్‌' పతనమై, 15 దేశాలుగా ముక్కలైంది. దేశ రాజధాని న్యూఢిల్లీలో అప్పటివరకూ ఉన్న సోవియట్‌ యూనియన్‌ దౌత్య కార్యాలయం కూడా రద్దయింది. వెనువెంటనే రష్యా, ఉక్రెయిన్‌, జార్జియా, బెలోరుస్సియా, ఉజ్బెకిస్తాన్‌, లిథువేనియా తదితర దేశాలు స్వతంత్రంగా తమతమ రాయబార కార్యాలయాలను ప్రపంచవ్యాప్తంగా తెరిచాయి. న్యూఢిల్లీలోనూ ఆయా దేశాల దౌత్య కార్యాలయాలు ప్రారంభమయ్యాయి. ఈ క్రమంలోనే రష్యన్‌ భాష తెలిసిన సైరీకి చేతి నిండా పని దొరికింది. పలు దేశాల రాయబార కార్యాలయాల్లో సలహాదారుగా, సహాయకురాలిగా వ్యవహరించింది. ఆయా కార్యాలయాల్లో పనిచేసే భారతీయులకు రష్యన్‌ బోధకురాలిగా పనిచేసింది. కంప్యూటర్‌ అంటే పెద్దగా తెలియని 1995లో ఒక దౌత్య కార్యాలయం అభ్యర్థన మేరకు వెబ్‌సైట్‌ రూపొందించింది.

ఆవేదన నుంచి ఆలోచన..