સંસદની કાર્યવાહી અવરોધવી એ વિપક્ષોની ઉપલબ્ધિ ગણાશે?

સંસદના ચોમાસુ સત્રની શરૂઆત થઈ ત્યારથી સતત ત્રણ સપ્તાહ સુધી સંસદનાં બંને ગૃહોમાં મહદ્અંશે ઊહાપોહ, હોબાળો અને શોરબકોર થતો રહ્યો છે. આવા શોરબકોરની વચ્ચે પણ સરકાર કેટલાક બિલ પસાર કરાવવામાં સફળ રહી. બંને ગૃહોની કાર્યવાહી શાંતિપૂર્વક ચાલી હોય એવા દિવસો અને કલાકો બહુ જૂજ રહ્યા છે, ત્યારે હવે આ સત્ર સમાપન થવાને બે-ત્રણ દિવસ બાકી રહ્યા છે, એવે સમયે સરકારે ઓબીસીમાં કઈ જ્ઞાતિ-જાતિ કે વર્ગનો સમાવેશ કરવો તે નક્કી કરવાની સત્તા રાજયોને આપતો બંધારણ સુધારા ખરડો નવમી ઑગસ્ટે લોકસભામાં રજૂ કર્યો એ સાથે જ શોરબકોરમાં વ્યસ્ત રહેતા વિરોધ પક્ષો સાવધ થઈ ગયા અને આ ખરડો પસાર કરવામાં સરકારને સમર્થન આપવા તૈયાર થઈ ગયા. વિપક્ષી નેતાઓની બેઠકમાં પણ એ અંગે સર્વસંમતિ સધાઈ.