રાષ્ટ્રીય રાજનીતિને અસરકર્તા ઘટનાક્રમ

રાષ્ટ્રીય રાજકારણમાં ફરી ઊથલપાથલનો દૌર શરૂ થયો છે. મોટા ભાગની ઘટનાઓ પ્રાદેશિક સ્તરની જરૂર છે, પરંતુ એ રાષ્ટ્રીય રાજનીતિને પ્રભાવિત કરનારી ઘટનાઓ છે. ચૂંટણીલક્ષી રાજકારણના આ સમયમાં ચૂંટણી પહેલાંના વર્ષથી રાજકીય પક્ષો અને નેતાઓ તેમના પક્ષ અને વ્યક્તિગત રાજકીય હિતોને લક્ષમાં રાખીને તખ્તો તૈયાર કરવામાં વ્યસ્ત બની જાય છે. છેક છેલ્લી ઘડીએ પાસા પલટવામાં સફળતાની ગેરંટી હોતી નથી. એટલે પાત્રોની રાજકીય કારકિર્દી માટે ચિંતિત લોકો હવે ઘણા વહેલા પક્ષ પલટો કરવા લાગ્યા છે. એક સમયે કોંગ્રેસના ટોચના અગ્રણીમાં જેમની ગણના થતી હતી અને ગાંધી પરિવારના નિકટના વ્યક્તિ ગણાતા હતા તે જિતિનપ્રસાદે ઉત્તર પ્રદેશ વિધાનસભાની ચૂંટણીના ઘણા સમય પહેલાં કોગ્રેસ છોડી ભાજપમાં જવાનું નક્કી કર્યું, તેમાં આવું જ ગણિત કામ કરી ગયું છે. ઉત્તર પ્રદેશમાં કોંગ્રેસને આ મોટો ફટકો છે. કોંગ્રેસ જ્યારે રાજયની આગામી ચૂંટણીમાં સારાં પરિણામો માટે પ્રયત્નશીલ હોય ત્યારે જિતિનપ્રસાદ જેવા નેતાની નારાજીનો નિવેડો લાવી ન શકે અને પક્ષ છોડવાની તેમની હિલચાલ વિશે અનભિજ્ઞ રહે એ વિસ્મયજનક લાગે છે.