സമ്പത്തു സ്യഷ്ടിക്കാൻ അതിബുദ്ധി വേണ്ട സാമാന്യബുദ്ധി മതി

കോടീശ്വരനാകാൻ വൻവരുമാനം ആവശ്യമില്ല. അച്ചടക്കത്തോടെ മികച്ച പദ്ധതികളിൽ നിക്ഷേപിച്ചാൽ കൂട്ടുപലിശയുടെ മാജിക് വർഷങ്ങൾ കൊണ്ട് ആരെയും കോടീശ്വരനാക്കും

നിമേഷ് ഷാ എം.ഡി & സിഇഒ, ഐസിഐസിഐ മ്യൂച്വൽ ഫണ്ട്

നിക്ഷേപത്തിലൂടെ സമ്പത്തു സൃഷ്ടിക്കാൻ അതിബുദ്ധിയുടെ ആവശ്യമില്ല. സാമാന്യ ബുദ്ധിയുള്ള ആർക്കും അധ്വാനിച്ചുണ്ടാക്കുന്നതിൽ നിന്നു മിച്ചം പിടിച്ച് ശരിയായി നിക്ഷേപിച്ചാൽ ഭാവിക്കാവശ്യമായ സമ്പത്തു സൃഷ്ടിച്ചെടുക്കാൻ യാതൊരു ബുദ്ധിമുട്ടുമില്ല.

കോടീശ്വരനാകാൻ വൻ വരുമാനം ആവശ്യമില്ല. ബിസിനസ് വരുമാനമോ മികച്ച സ്ഥിരവരുമാനമുള്ള ജോലിയോ ഉണ്ടെങ്കിലും അത് നിങ്ങളെ ഒരിക്കലും കോടീശ്വരനാക്കുകയുമില്ല. എന്നാൽ, ബുദ്ധിപരമായ ഓഹരി നിക്ഷേപത്തിലൂടെ ഏതൊരാൾക്കും നല്ലൊരു തുക സമ്പാദിക്കുവാനാകും. മിച്ചം പിടിക്കുന്ന തുക എത്രയായാലും അതും കൃത്യമായും അച്ചടക്കത്തോടെയും നിക്ഷേപിച്ചു തുടങ്ങുക. വരുമാനം കൂടുന്നതനുസരിച്ച് നിക്ഷേപവിഹിതവും കൂട്ടിക്കൊണ്ടു വരാം. ഇങ്ങനെ ചെയ്താൽ കൂട്ടുപലിശയെന്ന മാജിക് വർഷങ്ങൾകൊണ്ട് നിങ്ങളെ കോടീശ്വരനാക്കും.

ഇത്തരത്തിൽ നിക്ഷേപിക്കാൻ അതിബുദ്ധിയുടെ ആവശ്യമില്ല. അതുകൊണ്ടുതന്നെയാണ് സാമാന്യ ബോധം ഉള്ള ആർക്കും സമ്പത്ത് സൃഷ്ടിക്കാനാകും എന്നു പറയുന്നത്.

മികച്ചത് ഓഹരി തന്നെ

പണപ്പെരുപ്പത്തെ മറികടന്ന് വളരെ മെച്ചപ്പെട്ട ആദായം നേടാൻ ഓഹരി പോലെ മറ്റൊരു നിക്ഷേപമാർഗവുമില്ല. പക്ഷേ, ഓഹരിക്ക് അതിന്റേതായ വിവിധ നഷ്ടസാധ്യതകളുണ്ട്. അതുകൊണ്ടുതന്നെ കൃത്യമായി വിപണിയെ മനസ്സിലാക്കിയശേഷം മാത്രമേ സ്വയം നിക്ഷേപത്തിനു മുതിരാവൂ. കഴിഞ്ഞ ഒരു വർഷത്തിൽ ഓഹരി വിപണി നൽകിയ ആദായം ആരെയും അദ്ഭുതപ്പെടുത്തുന്നതാണ്. പക്ഷേ, അതുപോലെ എപ്പോഴും ആദായം കിട്ടണമെന്നില്ല. പലപ്പോഴും നഷ്ടവും സംഭവിക്കും.

മ്യൂച്വൽ ഫണ്ട് വഴി

അതിനാൽ, ശരിയായി മനസ്സിലാക്കാനുള്ള വൈദഗ്ധ്യം ഇല്ലാത്തവർ ഒരിക്കലും സ്വയം നിക്ഷേപിക്കരുത്. അത്തരക്കാർ മ്യൂച്വൽ ഫണ്ടിനെ ആശ്രയിക്കുന്നതാണ് എപ്പോഴും നല്ലത്.