கூட்டலாம், குறைக்கக் கூடாது!

வளர்ச்சி அடைந்த மாநிலங்களில் இருந்து பெறப்படும் வரி வருவாய் மூலம்தான், வளர்ச்சி அடையாத மாநிலங்களில் வளர்ச்சிப் பணிகளை மேற்கொண்டு தேசத்தின் சமச்சீர் வளர்ச்சிக்கு வழிகோல முடியும்.

- 

அதேநேரத்தில், மாநிலங்கள் தங்களது பங்களிப்புக்கு ஏற்ற அளவில், மத்திய அரசின் கவனம் பெறாமல் போனால் அது சரியான, நியாயமான ஜனநாயக முறைமை அல்ல. வரி வருவாய் பகிர்வில், அதிக அளவில் பங்களிக்கும் மாநிலங்களின் நியாயமான பங்கை மத்திய அரசு வழங்குதல் அவசியம் என்பதுதான் கூட்டாட்சித் தத்துவத்தின் அடிப்படை.

வருமான வரி, கார்ப்பரேட் வரி, சரக்கு-சேவை வரி உள்ளிட்ட முக்கியமான வரிகள் அனைத்தையும் வசூலிப்பது மத்திய அரசு தான். மது விற்பனை, பெட்ரோலிய பொருள்களின் விற்பனை, பத்திரப் பதிவுக் கட்டணம் உள்ளிட்டவை மட்டும்தான் மாநில அரசுகளின் வரி விதிப்பு வரம்புக்குள் வருகின்றன. மத்திய அரசு வசூலிக்கும் வரிகளில் இருந்து மாநிலங்களுக்கு வழங்கப்படும் பகிர்வுத் தொகைதான் மாநில அரசுகளின் முக்கியமான வருவாய்.

14-ஆவது நிதி ஆணையம் மத்திய அரசின் நிதிப் பகிர்வை 32%-இல் இருந்து 42%-ஆக அதிகரித்தது. 15-ஆவது நிதி ஆணையம் 42% என்பதை 1% குறைத்து 41% என்று நிர்ணயித்தது. இப்போது 16-ஆவது நிதி ஆணையம் அதை மேலும் 1% குறைக்கக் கூடும் என்கிற தகவல் அதிர்ச்சி அளிப்பதாக இருக்கிறது.

எந்தெந்த மாநிலங்களுக்கு எந்தெந்த அளவுக்கு மத்திய வரி வருவாய் பிரித்துக் கொடுக்கப்பட வேண்டும் என்பதை மத்திய நிதி ஆணையம் தீர்மானிக்கிறது. நிதிப் பகிர்வு மட்டுமல்லாமல், மத்திய-மாநிலங்களுக்கு இடையேயான எல்லா நிதி தொடர்பான விவகாரங்களையும் ஆய்வு செய்து பரிந்துரைப்பதும் நிதி ஆணையத்தின் பொறுப்பு.