பேரிடர் சவாலை எதிர்கொள்ள போதிய நிதி

மத்திய அரசுக்கு முதல்வர் ஸ்டாலின் வலியுறுத்தல். தூத்துக்குடியில் அமைச்சர் நிர்மலா சீதாராமன் ஆய்வு.

- 

மிக்ஜம் புயல்-தென் மாவட்ட அதிகனமழை பாதிப்பு சவால்களை எதிர்கொண்டு நிவாரணப் பணிகளை மேற்கொள்வதற்கு போதிய நிதியுதவியை மத்திய அரசு வழங்க வேண்டுமென முதல்வர் மு.க.ஸ்டாலின் வலியுறுத்தியுள்ளார். 

தூத்துக்குடி மாவட்டத்தில் மழை, வெள்ளம் பாதித்த பகுதிகளை மத்திய நிதியமைச்சர் நிர்மலா சீதாராமன் செவ்வாய்க்கிழமை பார்வையிட்டார். இந்த நிலையில், எக்ஸ் தளத்தில் முதல்வர் மு.க.ஸ்டாலின் வெளியிட்ட பதிவு:}

இந்தியாவிலேயே இரண்டாவது நீளமான கடலோரப் பகுதிகளைக் கொண்டுள்ளதுடன், கடந்த நூறாண்டுகளில் 50 புயல்களை எதிர்கொண்டுள்ள தமிழ்நாடு தொடர்ந்து இயற்கைச் சீற்ற ஆபத்துகளுக்கு உள்ளாகி வருகிறது.

தங்கம் தென்னரசு, கனிமொழி உள்ளிட்டோர்...: மிக்ஜம் புயல் ஏற்படுத்திய பாதிப்புகளுடன் சேர்ந்து, அண்மையில் தென் மாவட்டங்களில் பெய்த அதிகனமழையும் தமிழகத்தில் பெரும் சேதத்தை விளைவித்திருக்கிறது. சேதப் பகுதிகளை ஆய்வு செய்த மத்திய அமைச்சர் நிர்மலா சீதாராமனிடம், தமிழக நிதியமைச்சர் தங்கம் தென்னரசு, தூத்துக்குடி எம்.பி. கனிமொழி உள்ளிட்டோர் அரசு சார்பில் செய்யப்பட்ட நிவாரணப் பணிகளை எடுத்துக் கூறினர். 

72 பக்க மனு: மேலும், தமிழ்நாட்டில் ஏற்பட்ட வெள்ள பாதிப்புகள் குறித்த விவரங்கள் அடங்கிய 72 பக்க விரிவான கோரிக்கை மனுவையும் அளித்தனர். பேரிடரை எதிர்கொண்டு, நிவாரண மற்றும் சீரமைப்புப் பணிகளை மேற்கொள்வதற்கான நிதி ஆதாரங்களின் தேவையை வலியுறுத்தினர்.