Rain Rain Come Again

പിന്നെ, ചക്കയുടെയും മാങ്ങയുടെയുമൊക്കെ സീസൺ കൂടിയാണല്ലോ ജൂൺ. ചക്കയുടെയും മാങ്ങകളുടെയും പല വിഭവങ്ങളുണ്ടാക്കിക്കഴിക്കുന്നതും ഓർമ്മകളിലുണ്ട്.

- ജി. കൃഷ്ണൻ

വേനൽചൂടിൽ മനസ്സ് എപ്പോഴും ആഗ്രഹിച്ചതി മഴയാണ്. ഇടവമാസം പാതി യാകാൻ കാത്തിരിക്കുകയായിരുന്നു ഓരോ മനസ്സും. ഇപ്പോഴിതാ, ആ മഴക്കാലം എത്തിക്കഴിഞ്ഞിരിക്കുന്നു.

ജൂൺമാസം പിറക്കുവാൻ നിങ്ങൾ ആഗ്രഹിക്കുന്നുവോ എന്നായിരുന്നു ഇവിടെ ഒത്തുകൂടിയ മൂന്നു പേരോടും ചോദിച്ചത്.

മഴയുടെ നനവും കുളിരും അനുഭൂതിയും അനുഭവിക്കാത്തവരില്ലല്ലോ. അതു കൊണ്ടുതന്നെ ഡോണയും അഞ്ജനാ മോഹനും സൗമ്യയും മഴയുടെയും മഴക്കാലത്തെയും അനുഭവങ്ങൾ പങ്കുവച്ചു. അഞ്ജനാ മോഹൻ പറഞ്ഞു.

 "കേരളത്തിന് പുറത്തും നമ്മൾ പലയിടങ്ങളിലും പോകുമെങ്കിലും മഴയുടെ അനുഭവങ്ങൾ എനിക്കേറെയും പറയാനുള്ളത് നാട്ടിലേതു തന്നെയാണ്. കണ്ണൂരിലാണ് എന്റെ സ്വന്തം വീട്. അവിടുത്തെ മഴയും മഴക്കാലവും എനിക്ക് പ്രിയപ്പെട്ടതാണ്. അതെല്ലാം വളരെ പ്രത്യേകതയുള്ളതായും ഞാൻ കാണുന്നു. അവിടുത്തെ മണ്ണിന്റെ മണവും സ്കൂളിൽ പോകുന്ന ഓർമ്മകളും ഒക്കെ മനസ്സിലുണ്ട്. ഞാൻ വീട്ടിൽ നിന്നും സ്കൂളിലേയ്ക്ക് കൂട്ടുകാരുമൊരുമിച്ച് നടന്നിട്ടാണ് സ്കൂളിൽ പൊയ്ക്കൊണ്ടിരുന്നത്. സ്കൂൾ തുറക്കുന്നതോടെ ഇടവപ്പാതി മഴയും തുടങ്ങുമല്ലോ. മഴനനഞ്ഞും കുട പിടിച്ചുമുള്ള നടത്തവും അതിനിടയിലെ ഞങ്ങളുടെ ചിരിയും വർത്തമാനങ്ങളുമെല്ലാം ഇന്നോർക്കുമ്പോൾ നല്ല രസങ്ങൾ തന്നിരുന്നു.

പണ്ടൊക്കെ മിക്കവാറും കുട്ടികൾ മഴ പെയ്തു തുടങ്ങിയാൽ മഴയത്ത് കളിക്കുമല്ലോ. ഞാനും അങ്ങനെ മഴയത്ത് കളിക്കും. കടലാസുകൊണ്ട് തോണിയുണ്ടാക്കി അതിങ്ങനെ മഴയത്ത് ഒഴുക്കിവിടും. മുട്ടിയും തട്ടിയും മറിഞ്ഞും തിരിഞ്ഞുമെല്ലാം ആ കടലാസു തോണി ഒഴുകിപ്പോകുന്നത് കാണാൻ രസമായിരുന്നു. നമ്മൾ ഉദ്ദേശിക്കുന്ന വഴിയിലൂടെയൊന്നും തോണി പോകില്ല. അതൊക്കെത്തന്നെയായിരുന്നു അതിന്റെ രസങ്ങളും. വെള്ളക്കെട്ടിൽ കാലുകളിട്ടടിച്ച് വെള്ളം തെറിപ്പിച്ചുള്ള കളികളും മഴനനയലും ഒക്കെ ആരസത്തിൽ പ്രധാനമാണ്. ഇതെല്ലാം കൂട്ടുകാരുമൊരുമിച്ചാവും ചെയ്യുക. അതൊക്കെ എനിക്ക് നല്ല രസങ്ങൾ സമ്മാനിച്ചിട്ടുണ്ട്.