Evergreens breek Heibi se tuisvloek met 33 – 25 oorwinning

Evergreens-rugbyklub se drie jaar lange droom om die juk van verloor teen Heidelberg-rugbyklub af te skud, het die afgelope Saterdag gerealiseer toe hulle die tuisspan óp sy tuisveld, 'Never Lose Park' met 33 - 25 ore aangesit het.

- Clive Pretorius

Dit, nadat hulle rustyd met 14 - 3 in die derde ronde van die SWD Superliga A Top 8 voorgeloop het.

Dit was vanaf die afskop duidelik dat beide spanne bereid was om te wys wat in hulle steek, maar dit was die besoekers wat meer gebruik gemaak het van hulle kanse in die eerste helfte om die tuisspan se doellyn twee keer oor te steek om punte aan te teken.

Heibi het egter veel beter in die tweede helfte vertoon en het hulle hard probeer om die wedstryd in hul guns te beklink.

Die wedstryd het wel goeie rugby aan beide spanne se lojale ondersteuners opgedis en is daar agt keer agter die doellyn gekuier, waar van Evergreens vyf en Heibi drie drieë gedruk het.