બાપુનગરમાં તોફાની તત્ત્વોનો ભારે આતંક: બે યુવકને છરીના ઘા ઝીંક્યા, એકનું મોત

ગાળો બોલવા જેવી સામાન્ય બાબતમાં લોહિયાળ ખેલ ખેલાયો: પોલીસે ગણતરીના કલાકોમાં પાંચ આરોપીની ધરપકડ કરી

- 

વસ્ત્રાલમાં તોફાની તત્ત્વોએ મચાવેલી ધમાલ બાદ ગુંડા તત્ત્વોની શાન ઠેકાણે આવી ગઇ હશે તેવું માનવું તદન ખોટું સાબિત થયું છે. બે દિવસ પહેલાં ક્રાઇમ બ્રાંચમાં ગુનેગારોને બોલાવીને પોલીસ કમિશનર જી.એસ. મલિકે સુધરી જવા માટેની સૂચના આપી હતી. તેમ છતાંય કોઇ ફરક પડ્યો નથી. પોલીસની એક્શન બાદ પણ મોડી રાતે બાપુનગર વિસ્તારમાં લોહિયાળ ખેલ ખેલાતાં ગુનેગારો વધુ એક વખત મેદાનમાં ઊતર્યા હોય તેવું લાગી રહ્યું છે. મોડી રાતે પાંચ માથાભારે તત્ત્વોએ બે યુવક પર છરી વડે હુમલો કર્યો હતો, જેમાં એક યુવકનું ઘટનાસ્થળે મોત થયું હતું. જ્યારે બીજા યુવકની હાલત નાજુક થતાં તેને સારવાર માટે હોસ્પિટલ ખસેડવામાં આવ્યો હતો. યુવકનું મૃત્યુ થતાં કેટલાક કિન્નરોએ પોલીસનો હુરિયો પણ બોલાવતાં વિવાદ સર્જાયો છે.