தற்கொலை தடுப்பு சமுதாய கடமை!

பேராசிரியர் தி. ஜெயராஜசேகர்

- 

ந்திய மாணவர்களில் சுமார் 75 சதவீதம் பேர் கவலை மற்றும் மன அழுத்தத்துடன் இருக்கிறார்கள் என்று தேசிய மனநலம் மற்றும் நரம்பு மருந்தியல் நிறுவனத்தின் ஆய்வுகளும், ஒரு மணி நேரத்துக்கு ஓர் இந்திய மாணவர் தற்கொலை செய்துகொண்டு இறந்து போகிறார் என தேசிய குற்ற ஆவணப் பணியகத்தின் தரவுகளும் நம்மை எச்சரிக்கும் நிலையில், மாணவ, மாணவிகளின் கவலையைப் போக்கி தற்கொலை எண்ணத்தைக் களையும் வகையில் உச்ச நீதிமன்றம் சமீபத்தில் தேசிய பணிக்குழுவை அமைத்துள்ளது.

இந்திய சுகாதார அமைச்சகம் 2030 ஆம் ஆண்டுக்குள் தற்கொலை இறப்பை 10 சதவீதம் குறைக்க வேண்டும் என்ற நோக்குடன் தேசிய தற்கொலை தடுப்பு உத்தியை முதல் முறையாக நமது நாட்டில் அறிவித்தது. மூன்று ஆண்டுகளுக்குள் தற்கொலைக்கான கண்காணிப்பு வழிமுறைகளை ஏற்படுத்தவும், ஐந்து ஆண்டுகளுக்குள் மாவட்ட மனநலத் திட்டத்தின் கீழ் மனநல வெளி நோயாளி பிரிவுகளை மருத்துவமனைகளில் நிறுவவும், எட்டு ஆண்டுகளுக்குள் கல்வி நிறுவனங்களில் மனநலம் சம்பந்தப்பட்ட பாடத்தை பாடத்திட்டத்தின் ஓர் அங்கமாகச் சேர்க்கவும் இந்த உத்திகளை வகுத்த அமைப்பு திட்டமிட்டுள்ளது.