கசிந்த ராணுவ ரகசியங்கள்; இக்கட்டில் அமெரிக்க அரசு

மணி 11:44 - இதுதான் சரியான தருணம்; பருவநிலை சாதகமாக இருக்கிறது. தாக்குதல் நடவடிக்கையை சென்ட்காம் (ராணுவத்தின் மத்திய கட்டளையகம்) உறுதி செய்துவிட்டது

- 

மணி 12:15 - எஃப்-16 போர் விமானங்கள் புறப்பட்டுவிட்டன

மணி 13: 45 - எஃப்-18 விமானங்கள் இலக்குகளைத் தாக்கத் தொடங்கிவிட்டன. எம்க்யு-9 ட்ரோன்களும் ஏவப்படுகின்றன

மணி 15:36 - எஃப்-18 விமானங்களின் இரண்டாவது அடுக்குத் தாக்குதல் தொடங்குகிறது. போர்க்கப்பலில் இருந்து டமாஹாக் ஏவுகணை ஏவப்படுகிறது

யேமனில் ஹூதி கிளர்ச்சிப் படை தலைவர்கள் மற்றும் நிலைகளைக் குறிவைத்து அமெரிக்கா நடத்திவரும் தாக்குதல் தொடர்பாக அந்த நாட்டின் துணை அதிபர் ஜே.டி. வான்ஸ், பாதுகாப்புத் துறை அமைச்சர் பீட் ஹெக்சேத், வெளியுறவுத் துறை அமைச்சர் மார்க்கோ ரூபியோ, தேசிய உளவு அமைப்பின் இயக்குநர் துளசி கப்பார்ட், தேசிய பாதுகாப்பு ஆலோசகர் மைக்கேல் வால்ட்ஸ் உள்ளிட்ட உச்ச நிலை அமைச்சர்கள், பாதுகாப்பு உயரதிகாரிகள் 'சிக்னல்' என்ற தகவல் தொடர்பு செயலி மூலம் மேற்கொண்ட தகவல் பரிமாற்றத்தின் ஒரு பகுதி இது.

இதில், 'ஓபிஎஸ்இசி மிகவும் தெளிவாக இருக்கிறது' என்று வேறு அவர்கள் பேசிக் கொண்டிருக்கிறார்கள். அதாவது, 'இந்த ராணுவ நடவடிக்கை தொடர்பான தகவல்கள் அனைத்தும் வெளியே கசியாமல் ரகசியமாகவும், பாதுகாப்பாகவும் நடத்தப்படுகிறது' என்று அவர்களுக்கு அவர்களே கூறி திருப்திப்பட்டுக்கொண்டிருக்கிறார்கள்.