பிரதமர் மோடி இன்று முதல் 3 நாடுகள் பயணம்

கனடாவில் ஜி7 உச்சிமாநாட்டில் பங்கேற்கிறார்

- 

புது தில்லி, ஜூன் 14: சைப்ரஸ், கனடா, குரோஷியா ஆகிய 3 நாடுகளுக்கு பிரதமர் நரேந்திர மோடி ஞாயிற்றுக்கிழமை (ஜூன் 15) முதல் ஐந்து நாள்கள் அரசு முறைப் பயணம் மேற்கொள்ள விருக்கிறார். கனடா பயணத்தில் ஜி7 நாடுகளின் உச்சிமாநாட்டில் அவர் பங்கேற்று உரை நிகழ்த்தவுள்ளார்.

ஐரோப்பிய நாடான குரோஷியாவுக்கு பயணிக்கும் முதல் இந்திய பிரதமர் என்ற பெருமை பிரதமர் மோடிக்கு கிடைக்கவுள்ளது. மத்தியதரைக் கடலில் அமைந்துள்ள தீவு நாடான சைப்ரஸுக்கு இந்திய பிரதமர் பயணிப்பது, கடந்த 20 ஆண்டுகளில் இதுவே முதல்முறையாகும்.

பாகிஸ்தானில் இந்திய ராணுவம் மேற்கொண்ட ஆபரேஷன் சிந்தூர் வெற்றிகர நடவடிக்கைக்குப் பிறகான பிரதமரின் முதல் வெளிநாட்டுப் பயணம் என்பதால் முக்கியத்துவம் பெற்றுள்ளது.

இது தொடர்பாக வெளியுறவுத் துறை அமைச்சகம் சனிக்கிழமை வெளியிட்ட செய்திக்குறிப்பில் கூறப்பட்டதாவது: மூன்று நாடுகள் அரசுமுறைப் பயணத்தின் முதல்கட்டமாக, சைப்ரஸ் அதிபர் நிகோஸ் கிறிஸ்டோடௌலிடிஸின் அழைப்பின்பேரில் அந்நாட்டுக்கு பிரதமர் மோடி ஞாயிற்றுக்கிழமை (ஜூன் 15) செல்லவிருக்கிறார். ஜூன் 16 வரை அங்கு பயணம் மேற்கொண்டு, பல்வேறு நிகழ்ச்சிகளில் பங்கேற்கவுள்ளார்.