உயர்நீதிமன்ற நீதிபதி குறித்து வழக்குரைஞர் விமர்சித்த விவகாரம்: தலைமை நீதிபதிக்கு பரிந்துரை

உயர்நீதிமன்ற நீதிபதி ஜி.ஆர். சுவாமிநாதனை விமர்சித்து, சமூக ஊடகங்களில் வழக்குரைஞர் ஒருவர் பேசியது தொடர்பான பதிவுகளை சென்னை உயர்நீதிமன்றத் தலைமை நீதிபதி அமர்வின் நடவடிக்கைக்கு அனுப்ப திங்கள்கிழமை உத்தரவு பிறப்பிக்கப்பட்டது.

- 

மதுரை, ஜூலை 28:

உயர்நீதிமன்ற நீதிபதி ஜி.ஆர். சுவாமிநாதனின் தீர்ப்புகள் தொடர்பாக வழக்குரைஞர் வாஞ்சிநாதன் சில குற்றச்சாட்டுகளை முன்வைத்து உச்சநீதிமன்றத் தலைமை நீதிபதிக்கு கடிதம் அனுப்பினார். அந்தக் கடிதம் அண்மையில் சமூக ஊடகங்களில் வெளியானது.

இந்த நிலையில், விசாரணையில் உள்ள ஒரு வழக்கின் வழக்குரைஞர் என்ற அடிப்படையில், உயர்நீதிமன்ற மதுரை அமர்வு நீதிபதிகள் ஜி.ஆர்.சுவாமிநாதன், ராஜசேகரன் அமர்வில் முன்னிலையாக வழக்குரைஞர் வாஞ்சிநாதனுக்கு அழைப்பாணை அனுப்பப்பட்டது. இதன்படி, நீதிபதிகள் ஜி.ஆர். சுவாமிநாதன், ராஜசேகரன் அமர்வில் வழக்குரைஞர் வாஞ்சிநாதன் கடந்த வெள்ளிக்கிழமை (ஜூலை 25) முன்னிலையானார்.

அப்போது, 'என்னுடைய தீர்ப்புகள் குறித்து சமூக ஊடகங்களில் தாங்கள் தெரிவித்த கருத்துகளில் தற்போதும் உறுதியாக உள்ளீர்களா? என வழக்குரைஞர் வாஞ்சிநாதனிடம் நீதிபதி ஜி.ஆர். சுவாமிநாதன் கேள்வி எழுப்பினார். இதற்கு, எழுத்துப்பூர்வமாக கேட்டால் விளக்கம் அளிப்பதாக வழக்குரைஞர் வாஞ்சிநாதன் பதில் அளித்தார். பிறகு, இது குறித்து திங்கள்கிழமை (ஜூலை 28) இதே அமர்வில் வாஞ்சிநாதன் பதில் அளிக்க வேண்டும் என நீதிபதிகள் உத்தரவிட்டனர்.