அரிமளம் பொன்னம்பட்டி 'கல்மரங்கள்' பாதுகாக்கப்படுமா?

புதுக்கோட்டை மாவட்டம் அரிமளம் பொன்னம்பட்டியில் வனத்துறையின் கட்டுப்பாட்டிலுள்ள தைலமரக் காடுகளுக்குள் கல்மரங்கள் கிடைத்துள்ள பகுதியில் சிறிய அகழாய்வை மேற்கொண்டு, அதே பகுதியில் கல்மரங்களை பாதுகாப்புடன் பார்வைக்கும் வைக்க தொல்லியல் ஆர்வலர்கள் எதிர்பார்க்கின்றனர்.

- நமது நிருபர்

புதுக்கோட்டை, ஆக. 10:

கோடிக்கணக்கான ஆண்டுகளுக்கு முன் பூமியில் நேரிட்ட மாறுபாடுகளில் பூமிக்குள் புதைந்துள்ள மரங்கள், வேதியியல் மாற்றத்தால் கல்லாகிப் போவதை 'கல்மரங்கள்' என்கிறோம்.

தமிழ்நாட்டில் பெரம்பலூர் மாவட்டம், சாத்தனூரிலும், விழுப்புரம் மாவட்டம், திருவக்கரையிலும் கிடைத்த சுமார் 10 முதல் 15 கோடி ஆண்டுகள் பழைமையான கல் மரத் தொகுப்புகள், ஆய்வுக்குப் பிறகு பாதுகாக்கப்பட்டு, பொதுமக்களின் பார்வைக்கும் வைக்கப்பட்டுள்ளன.

புதுக்கோட்டை மாவட்டத்தைப் பொருத்தவரை, பல ஆண்டுகளுக்கு முன் திருவரங்குளம் பகுதியிலும், நகரப் பகுதியில் நரிமேட்டிலும் கடந்த 3 ஆண்டுகளுக்கு முன் கிடைத்த கல் மரத் துண்டுகள் அரசு அருங்காட்சியகத்தில் ஒப்படைக்கப்பட்டுள்ளன.