இந்திய வீரர் சுபான்ஷு சுக்லா நாளை மறுநாள் விண்வெளி பயணம்!

இந்திய விண்வெளி வீரர் சுபான்ஷு சுக்லா, ஆக்ஸிம்-4 திட்டத்தின் கீழ் சர்வதேச விண்வெளி நிலையத்துக்கு வரும் செவ்வாய்க்கிழமை (ஜூன் 10) பயணிக்கிறார்.

- 

புது தில்லி, ஜூன் 7:

'டிராகன்' விண்கலத்தில் 28 மணி நேர பயணத்துக்குப் பிறகு புதன்கிழமை இரவு 10 மணியளவில் சுபான்ஷு சுக்லா சர்வதேச விண்வெளி நிலையத்தைச் சென்றடைவார்.

மனிதர்களை விண்ணுக்கு அனுப்பும் இந்தியாவின் 'ககன்யான்' திட்டத்துக்காக தேர்வான வீரர்களில் ஒருவரான சுக்லா, அனுபவப் பயிற்சி நோக்கங்களுக்காக விண்வெளிக்குப் பயணிக்க உள்ளார்.

அமெரிக்காவில் செயல்படும் மனித விண்வெளிப் பயண சேவைகள் நிறுவனமான 'ஆக்ஸிம் ஸ்பேஸ்' நிறுவனத்தின் ஆக்ஸிம்-4 திட்டத்தின் கீழ் இப்பயணம் மேற்கொள்ளப்பட உள்ளது. சுக்லாவுடன் போலந்து வீரர் ஸ்லாவோஸ் உஸ்னான்ஸ்கி விஸ்னீவ்ஸ்கி, ஹங்கேரி வீரர் திபோர்கபு ஆகியோரும் விண்வெளிக்குப் பயணிக்க இருக்கின்றனர்.

அமெரிக்காவின் புளோரிடாவில் உள்ள நாசாவின் கென்னடி விண்வெளி நிலையத்தில் இருந்து எலான் மஸ்க்குக்குச் சொந்தமான 'ஸ்பேஸ்-எக்ஸ்' நிறுவனத்தின் ஃபால்கன் 9 ஏவுகணை மூலம் விண்ணில் ஏவப்படும் 'டிராகன்' விண்கலத்தில் இவர்கள் பயணிக்கின்றனர்.