குடியரசு துணைத் தலைவர் தன்கர் ராஜிநாமா

இந்தியாவின் 14-ஆவது குடியரசு துணைத் தலைவர் ஜகதீப் தன்கர் (74) தனது பதவியை திங்கள்கிழமை திடீரென ராஜிநாமா செய்தார்.

- 

அவருக்கு இன்னும் சுமார் இரண்டு ஆண்டுகள் பதவிக் காலம் மீதமுள்ள நிலையில், உடல்நலனுக்கு முக்கியத்துவம் அளிக்க இந்த முடிவை எடுத்ததாக தனது ராஜிநாமா கடிதத்தில் குறிப்பிட்டுள்ளார்.

முன்னாள் குடியரசு துணைத் தலைவர் வெங்கையா நாயுடு ஓய்வு பெற்றதைத் தொடர்ந்து, கடந்த 2022-ஆம் ஆண்டு நடைபெற்ற குடியரசு துணைத் தலைவர் தேர்தலில் பாஜக தலைமையிலான தேசிய ஜனநாயகக் கூட்டணி வேட்பாளராக ஜகதீப் தன்கர் களமிறக்கப்பட்டார்.

தேர்தலில் பதிவான மொத்தம் 710 வாக்குகளில் 528 வாக்குகள் பெற்று, எதிர்க்கட்சி வேட்பாளரான முன்னாள் மத்திய அமைச்சரும், முன்னாள் ஆளுநருமான மார்கரெட் ஆல்வாவைத் தோற்கடித்தார். இதையடுத்து, நாட்டின் 14-ஆவது குடியரசு துணைத் தலைவராக ஜகதீப் தன்கர் 2022, ஆகஸ்ட் 11-ஆம் தேதி பொறுப்பேற்றார்.

குடியரசு துணைத் தலைவர் பதவியிலிருந்து விலகுவதாக குடியரசுத் தலைவர் திரௌபதி முர்முக்கு அவர் ராஜிநாமா கடிதத்தை திங்கள்கிழமை அனுப்பினார்.

அதில், 'மருத்துவர்களின் ஆலோசனையின்படி, உடல்நலனுக்கு முக்கியத்துவம் அளிப்பதற்காக குடியரசு துணைத் தலைவர் பதவியை ராஜிநாமா செய்கிறேன். இந்திய அரசமைப்புச் சட்டத்தின் 67(ஏ) பிரிவின்கீழ், உடனடியாக அமலுக்கு வரும் வகையில் இதை மேற்கொண்டுள்ளேன்.

எனக்கு வழங்கிய அசைக்க முடியாத ஆதரவுக்கும், அற்புதமான பணிச்சூழலுக்கும் நன்றி. பிரதமர் நரேந்திர மோடி மற்றும் அவரது தலைமையிலான அமைச்சரவைக்கும் நான் நன்றிக்கடன்பட்டுள்ளேன்.