9 மாவட்டங்களில் மகளிருக்கான புதிய விடுதிகள்

முதல்வர் மு.க.ஸ்டாலின் அறிவிப்பு

- 

சிவகங்கை, தேனி, தருமபுரி உள்ளிட்ட 9 மாவட்டங்களில் ரூ.72 கோடியில் புதிதாக தோழி விடுதிகள் அமைக்கப்படும் என்று முதல்வர் மு.க.ஸ்டாலின் அறிவித்தார்.

சர்வதேச மகளிர் தினத்தையொட்டி, தமிழக அரசின் சார்பில் சென்னை நேரு உள் விளையாட்டு அரங்கத்தில் சனிக்கிழமை நடைபெற்ற விழாவில் முதல்வர் மு.க.ஸ்டாலின் பேசியதாவது:

திராவிட இயக்கத்தின் அடிப்படை நோக்கமே ரத்த பேதம் இல்லை, பால் பேதம் இல்லை என்பதுதான். அதுவே முழுமையான சமூக நீதி.

திராவிட இயக்கத்தை உருவாக்கிய பெரியார் வாழ்நாளெல்லாம் பெண் விடுதலைக்காக உழைத்தார். மனித வர்க்கத்துக்கு அடிமைத் தத்துவம் ஒழிய வேண்டும் என்றால், பெண்ணை அடிமையாக நினைக்கிற எண்ணம் ஒழிந்தால்தான் முடியும் என்று சொன்னார்.

அதனால்தான், திராவிட இயக்க ஆட்சிக் காலங்களில் பெண்களுக்கு உரிமைகள் மீட்டுத் தரப்பட்டன. திராவிட இயக்கத்துக்கு ஆதி விதையான நீதிக்கட்சி ஆட்சியில்தான் பெண்களுக்கு முதன்முதலாக வாக்குரிமை தரப்பட்டது.

பெரியார் வழித்தடத்தில் வந்த அண்ணா சுயமரியாதை திருமணச் சட்டத்தை நிறைவேற்றினார். பெரியார் நிறைவேற்றிய தீர்மானத்தை சட்டமாக்கி சொத்துரிமை தந்தவர் கருணாநிதி. காவல் துறையில் மகளிர், மகளிர் சுய உதவிக் குழுக்கள், மகளிருக்கு உள்ளாட்சி அமைப்புகளில் 33 சதவீத இடஒதுக்கீடு என்று பல முற்போக்குத் திட்டங்களைக் கொண்டு வந்தார்.