தரமான கல்வி வழங்குவதில் தமிழகம் 2-ஆம் இடம்

தரமான கல்வி வழங்குவதில் நாட்டிலேயே தமிழ்நாடு இரண்டாவது இடத்தில் உள்ளதாக முதல்வர் மு.க.ஸ்டாலின் தெரிவித்தார்.

- 

கடலூர் மாவட்டம், வேப்பூர் வட்டம், திருப்பெயரில் சனிக்கிழமை நடைபெற்ற 'பெற்றோர்களைக் கொண்டாடுவோம்' 7-ஆவது மண்டல மாநாட்டில் பங்கேற்று மேலும் அவர் பேசியதாவது:

பெற்றோர்-ஆசிரியர்கள், மாணவர்கள் என மூன்று தரப்பினருக்குமான கருத்துகளை வழங்கும் மாநாடு இது. மதுரை, திருச்சி, தருமபுரி, கோவை, காஞ்சிபுரம், திருநெல்வேலி என 6 மண்டலங்களில் நடைபெற்ற 'பெற்றோரைக் கொண்டாடுவோம்' மாநாட்டில் 1.95 லட்சம் பள்ளி பெற்றோர்-ஆசிரியர் கழக உறுப்பினர்கள் பங்கேற்றனர்.

ஏழாவதாக கடலூர், விழுப்புரம், திருவண்ணாமலை, கள்ளக்குறிச்சி, அரியலூர், பெரம்பலூர், மயிலாடுதுறை ஆகிய 7 மாவட்டங்களைக் கொண்ட மாநாட்டில் ஒரு லட்சம் பேர் பங்கேற்று இருக்கிறார்கள்.

தமிழ்நாட்டின் செல்வம் மாணவர்கள்: பள்ளிகளை உருவாக்கினோம், மாணவர்களைச் சேர்த்தோம், படிக்க வைத்தோம், மதிப்பெண் வாங்க வைத்தோம், வெளியில் அனுப்பினோம் என இத்துடன் பள்ளிக் கல்வித் துறையின் கடமை முடிந்துவிடவில்லை. ஒவ்வொரு மாணவ, மாணவியும் தமிழ்நாட்டின் செல்வம் என்ற நினைப்புடன் அவர்களை வளர்த்து வருகிறோம். திமுக அரசுக்கு கல்வி-மருத்துவம் இரு கண்கள்.