பேராசிரியர் எஸ்.வையாபுரிப் பிள்ளையின் நாட்குறிப்புகள்

கணிதம், உடற்கூறியல், தாவரவியல், இயற்பியல், வணிகவியல், வரலாறு அரசியல், பொருளாதாரம், ஆட்சியியல் முதலான பல்வேறு துறைச் சொற்களைத் திருத்திச் சீரமைக்கும் பணியில் பேராசிரியர் வையாபுரிப்பிள்ளை முனைந்து செயல்பட்டதை அவருடைய நாட்குறிப்புகள் தெரிவிக்கின்றன.

- முன்னாள் தமிழியல் துறைத் தலைவர், பாரதிதாசன் பல்கலைக்கழகம்

ஆராய்ச்சி மன்னர், நடுநின்றாய்ந்த ஆபீடுடையாளர் என்றெல்லாம் அறியப்பட்டவர் பேராசிரியர் வையாபுரிப் பிள்ளை (1891-1956). பிப்ரவரி 17-ஆம் தேதி அவரது நினைவு நாள். 1936-ஆம் ஆண்டு தொடங்கி 1956 பிப்ரவரி 9-ஆம் தேதி வரையிலும் 20 ஆண்டுகள் நாட்குறிப்பு எழுதுகிறார். பேராசிரியரின் நாட்குறிப்புகள், அவரது பன்முக வாழ்க்கைப் பயணத்தின் கண்ணாடி. வரன்முறைக்குட்பட்ட வாழ்க்கை நெறி, துறைப் பணி, ஆய்வு, நண்பர்கள் வட்டம், தன் முனைப்பு, செய்வன திருந்தச் செய்யும் இயல்பு எனப் பல நிலைகளில் அவருடைய இயல்புகள் அவரது நாட்குறிப்புகள் மூலம் வெளிப்படுகின்றன.

நூல் பரிசோதனையிலும், ஏடு பரிசோதனையிலும் மிகுந்த ஈடுபாட்டோடு செயலாற்றியவர் பேராசிரியர். பல ஊர்களிலுள்ள ஆவணப் பாதுகாப்பு மையங்களுக்குச் சென்று அவற்றைப் பயன்படுத்தியிருக்கிறார்.

எந்தவொரு பணியை எடுத்துக்கொண்டாலும் அதன் திட்டத்தை முன்னரேயே வகுத்துக் கொள்ளும் இயல்புடையவர். இப்பண்பு அவருக்குத் தம் பணியைக் குறித்த நேரத்தில் முடிக்கத் துணை நின்றது எனலாம். ஒவ்வொரு திராவிட மொழியின் வரலாற்று இலக்கணம் மற்றும் ஒப்பீட்டு இலக்கணத்திற்கான பொதுத் திட்ட வரைவு தயாரிக்கப்பட்டது என்ற குறிப்பிலிருந்து திராவிட மொழியின் வரலாற்று இலக்கணம் தயாரிக்க வேண்டும் என்ற அவரது முனைப்பு வெளிப்படுகிறது.

அவர் திருவிதாங்கூர் பல்கலைக்கழகத்தில் துறைத்தலைவராகப் பணியாற்றிய காலத்தில் தம் ஆய்வு மாணவரான டாக்டர் வ.அய்.சுப்பிரமணியத்திடம் (தஞ்சாவூர் தமிழ்ப் பல்கலைக்கழகத்தின் முதல் துணைவேந்தர்) மொழியாய்வாளர்களுக்குப் பிறமொழியறிவு தேவை என்பதைக் குறித்து விளக்கியிருக்கிறார் என்ற குறிப்பும் கிடைக்கிறது.

அவருடைய ஆய்வுலக நண்பர்கள் பலர். தமிழ்நாடு என்று மட்டுமன்றி இலங்கையிலும் அவருக்கு ஆய்வு மாணவர்களும் நண்பர்களும் இருந்தனர். அவர்களுள் இலக்கிய அறிஞர்கள் மட்டுமன்றி க.அ. நீலகண்ட சாஸ்திரி என்கிற புகழ் பெற்ற வரலாற்றறிஞர் உட்பட பிற துறை அறிஞர்களும் அடங்குவர். டி.கே.சி, கவிமணி, பெ.நா.அப்புசாமி முதலான பல நண்பர்களோடு அவர் பல வகையான இலக்கிய ஆய்வுகளில் ஈடுபட்டிருக்கிறார்.