கர்நாடக ஏ.டி.எம். பணம் கொள்ளை சம்பவம் பாதுகாவலரை சுட்டுக் கொன்றவர் அடையாளம் தெரிந்தது

ஹைதராபாத், இந்தூர் விரைந்தது தனிப்படை

- 

கர்நாடக மாநிலம், பீதரில் வங்கி ஏடிஎம் இயந்திரத்தில் பணம் நிரப்ப சென்ற பாதுகாவலரை சுட்டுக்கொன்று பணத்தை கொள்ளையடித்து சென்ற மர்மநபர்களின் அடையாளம் தெரிய வந்துள்ளது. அவர்களைப் பிடிக்க தெலங்கானா மாநிலம் ஹைதராபாத், மற்றும் மத்திய பிரதேச மாநிலம் இந்தூருக்கு தனிப்படை போலீஸார் விரைந்துள்ளனர்.

பீதர் நகரில் மாவட்ட ஆட்சியர் அலுவலகம் அருகே அமைந்துள்ள சிவாஜி சதுக்கத்தில் வியாழக்கிழமை (ஜன. 16) காலை 10.55 மணி அளவில் அப்பகுதியில் உள்ள வங்கி ஏடிஎம் இயந்திரத்தில் பணம் நிரப்புவதற்காக சி.எம்.எஸ். முகமையைச் சேர்ந்த பாதுகாவலர்கள் கிரி வெங்கடேஷ் (37), சிவா காசிநாத் (35) ஆகியோர் வேனில் வந்தனர். வேனில் இருந்து பணப்பெட்டியை அவர்கள் கீழே இறக்கும்போது, இருசக்கர வாகனத்தில் அங்கு வந்த மர்மநபர்கள் இருவர், பாதுகாவலர்கள் மீது மிளகாய்ப் பொடியைத் தூவி, துப்பாக்கியால் 8 முறை சுட்டனர். இதில் கிரி வெங்கடேஷ் நிகழ்விடத்திலேயே உயிரிழந்தார்.

மற்றொரு பாதுகாவலரான சிவா காசிநாத் பலத்த காயங்களுடன் மருத்துவமனையில் சிகிச்சை பெற்று வருகிறார்.