மத்திய அரசின் நிபந்தனைகளால் முடங்கும் சூழலில் மாநிலத் திட்டங்கள்

பேரவையில் முதல்வர் ஸ்டாலின் குற்றச்சாட்டு

- 

மாநில அரசுக்கு எதிராக நிபந்தனைகளை விதித்து திட்டங்களை முடக்கும் சூழலை மத்திய அரசு உருவாக்குவதாக சட்டப்பேரவையில் முதல்வர் மு.க.ஸ்டாலின் குறிப்பிட்டார்.

மேலும், அரசின் திட்டங்களால் பயன் பெறும் பயனாளிகளின் எண்ணிக்கை விவரங்களையும் அவர் வெளியிட்டார்.

சட்டப்பேரவையில் ஆளுநர் உரைக்கு நன்றி தெரிவிக்கும் தீர்மானத்தின் மீது நடைபெற்ற விவாதங்களுக்குப் பதிலளித்து முதல்வர் ஸ்டாலின் சனிக்கிழமை பேசியதாவது:

மாதந்தோறும் மகளிருக்கு ரூ.1,000 உரிமைத் தொகை வழங்கப்படுகிறது. இந்தத் திட்டத்தின் கீழ், ஒரு கோடியே 14 லட்சம் மகளிர் பயன் பெற்று வருகிறார்கள். அவர்களின் முகங்களில் தெரியும் மகிழ்ச்சிதான் விடியல் ஆட்சிக்கு சாட்சி.

மாணவிகளுக்கு உதவித் தொகை: மாணவர்களின் திறன்களை வளர்த்தெடுக்கும் 'நான் முதல்வன்' திட்டத்தின் கீழ், இதுவரையில் 22 லட்சத்து 56 ஆயிரம் பேருக்கு பயிற்சி அளிக்கப்பட்டுள்ளது. பயிற்சி பெற்ற பல லட்சக்கணக்கான மாணவர்களுக்கு உடனடியாக வேலை கிடைத்துள்ளது.

உயர் கல்வி படிக்கும் மாணவ, மாணவியருக்கு மாதந்தோறும் ஆயிரம் ரூபாய் வழங்கும் திட்டம், தமிழ் புதல்வன் மற்றும் புதுமைப் பெண் ஆகிய பெயர்களால் செயல்படுத்தப்படுகிறது. இதன்மூலம் கல்லூரிக்குச் செல்லும் மாணவிகளின் எண்ணிக்கை 30 சதவீதம் அதிகரித்து இருக்கிறது. அத்துடன், மாதந்தோறும் 2 லட்சத்து 72 ஆயிரம் மாணவ, மாணவியர் பயன்பெற்று வருகிறார்கள்.

இரண்டு திட்டங்களைப் பயன்படுத்தி படித்துவரும் மாணவ, மாணவிகள் என்னை 'அப்பா' என அழைக்கும்போது அளவில்லாத மகிழ்ச்சி அடைகிறேன். இந்தப் பாச உணர்வுதான் முக்கியம்.

ஊட்டச்சத்தை உறுதி செய்யக்கூடிய திட்டத்தின் கீழ், தீவிர ஊட்டச்சத்து குறைபாடு உள்ளதாகக் கண்டறியப்பட்ட குழந்தைகளில் 77.3 சதவீத குழந்தைகள் இயல்பு நிலைக்குத் திரும்பியுள்ளனர். ஊட்டச்சத்து குறைபாடு உள்ள 6 மாதங்களுக்கு உட்பட்ட 76,705 குழந்தைகள் கண்டறியப்பட்டு, அவர்களுடைய பாலூட்டும் தாய்மார்களுக்கு ஊட்டச்சத்துப் பெட்டகங்கள் வீட்டுக்கே சென்று வழங்கப்பட்டுள்ளன.

பள்ளி செல்லும் குழந்தைகள் பட்டினியோடு இருக்கக் கூடாது என்பதற்காக தினமும் காலையில் 17 லட்சத்து 53 ஆயிரம் மாணவ, மாணவியருக்கு காலை உணவு வழங்கப்படுகிறது.