இந்தியாவை வடிவமைத்த ராஜதந்திரி வாஜ்பாய்!

டிசம்பர் 25, நம் அனைவருக்கும் மிகவும் சிறப்பான நாள். நமது அன்புக்குரிய மறைந்த முன்னாள் பிரதமர் அடல் பிகாரி வாஜ்பாயின் 100-ஆவது பிறந்தநாளை இன்று நாடு கொண்டாடுகிறது.

- பிரதமர் நரேந்திர மோடி

எண்ணற்ற மக்களுக்கு தொடர்ந்து ஊக்கமளிக்கும் ஒரு சிறந்த ராஜதந்திரியாக இன்றும் அவர் உயர்ந்து நிற்கிறார்.

21-ஆம் நூற்றாண்டை நோக்கிய இந்தியாவுக்கு மாற்றத்தின் சிற்பியாக திகழ்ந்த வாஜ்பாய்க்கு நாடு எப்போதும் நன்றியுள்ளதாக இருக்கும்.

1998-ஆம் ஆண்டில் அவர் பிரதமராக பதவி ஏற்றபோது, நமது நாடு நிலையற்ற அரசியல் காலகட்டத்தைக் கடந்து சென்றது. அதற்கு முந்தைய 9 ஆண்டுகளில் 4 முறை மக்களவைத் தேர்தல் நடந்தது. இந்திய மக்கள் பொறுமையிழந்தனர்; அரசுகளால் நன்மைகளை வழங்க முடியுமா என்ற சந்தேகமும் ஏற்பட்டது. நிலையான, சிறப்பான ஆட்சியை வழங்கியதன்மூலம் இந்த நிலையை மாற்றியவர் வாஜ்பாய்.

எளிய குடும்பத்திலிருந்து வந்த அவர், சாதாரண குடிமகனின் வாழ்க்கைப் போராட்டங்களையும், மாற்றத்தை ஏற்படுத்தும் திறமையான நிர்வாகத்தின் சக்தியையும் உணர்ந்திருந்தார்.

சீர்திருத்தங்களுக்கு முன்னோடி: இந்தியாவின் நான்குமுனைகளையும் இணைத்த தங்க நாற்கர சாலைத் திட்டத்தை இன்றும்கூட பெரும்பாலோர் நினைவுகூர்கின்றனர். சமுதாய நலனைப் பொருத்தவரை, நாடு முழுவதும் உள்ள மக்களுக்கு, குறிப்பாக ஏழை எளிய பிரிவினருக்கு நவீன கல்வி கிடைக்கும் இந்தியாவை உருவாக்க வாஜ்பாய் எவ்வாறு கனவு கண்டார் என்பதை அனைவருக்கும் கல்வித் திட்டம் போன்ற முன்முயற்சி எடுத்துக்காட்டுகிறது. அதே நேரத்தில், அவரது அரசு பல பொருளாதார சீர்திருத்தங்களுக்கு முன்னோடியாகத் திகழ்ந்தது.