பேட்டிங்கில் கில், பந்த்; பௌலிங்கில் ஜடேஜா, அஸ்வின் அசத்தல்

நியூஸிலாந்துக்கு எதிரான 3-ஆவது டெஸ்ட்டில் இந்தியா முதல் இன்னிங்ஸில் 263 ரன்கள் சேர்த்து ஆட்டமிழந்தது. பின்னர் நியூஸிலாந்தின் 2-ஆவது இன்னிங்ஸில் அந்த அணியை 171 ரன்களுக்கு 9 விக்கெட்டுகளை இழக்கச் செய்து, ஆட்டத்தில் தனது கட்டுப்பாட்டை மீட்டு வருகிறது.

- 

முன்னதாக பேட்டிங்கில் ஷுப்மன் கில், ரிஷப் பந்த் ஆகியோர் சிறப்பாக ரன்கள் சேர்த்து அணியை முன்னிலைப்படுத்த, பௌலிங்கில் ரவீந்திர ஜடேஜா, ரவிச்சந்திரன் அஸ்வின் நியூஸிலாந்து பேட்டர்களை திணறடித்தனர். 2-ஆவது இன்னிங்ஸில் எளிதான இலக்கை எதிர்நோக்கியிருக்கும் இந்தியா, வெற்றிக்காக தனது பேட்டர்களின் பங்களிப்பை எதிர்பார்க்கிறது.

மும்பையில் கடந்த வெள்ளிக்கிழமை தொடங்கிய ஆட்டத்தில் முதலில் பேட் செய்த நியூஸிலாந்து, 235 ரன்களுக்கு ஆட்டமிழந்தது. பின்னர் தனது இன்னிங்ஸை தொடங்கிய இந்தியா, முதல் நாள் முடிவில் 86 ரன்களுக்கே 4 விக்கெட்டுகளை இழந்து தடுமாற்றமான நிலையில் இருந்தது. 2-ஆவது நாளான சனிக்கிழமை ஆட்டத்தை ஷுப்மன் கில், ரிஷப் பந்த் தொடர்ந்தனர்.