‘எனது இளைய பாரதம்' திட்டம் நாளை தொடக்கம் - சர்தார் படேலுக்கு கௌரவம்; பிரதமர் மோடி

சர்தார் வல்லபபாய் படேலின் பிறந்த தினமான அக்டோபர் 31-ஆம் தேதி 'எனது இளைய பாரதம்' திட்டம் தொடங்கப்படும் என்று பிரதமர் நரேந்திர மோடி தெரிவித்தார்.

- 

இது தொடர்பாக அவர் 'மனதின் குரல்' எனப்படும் தனது மாதாந்திர வானொலி நிகழ்ச்சியில் ஞாயிற்றுக்கிழமை கூறியதாவது: சர்தார் வல்லபபாய் படேலின் பிறந்த தினமான அக்டோபர் 31 அன்று 'எனது இளைய பாரதம்' திட்டம் தொடங்கப்படும். இதற்கான இணையதளமும் தொடங்கப்படும். இளைஞர்கள் அதில் தங்களைப் பதிவு செய்து கொள்ள வேண்டும்.

தேசத்தைக் கட்டமைக்கும் பல்வேறு நிகழ்ச்சிகளில் இளைஞர்கள் தீவிரமாகப் பங்களிக்க இத்திட்டம் மேடை அமைத்துத் தரும். ஒரு வளர்ந்த இந்தியாவை உருவாக்குவதில் இளைஞர் சக்தியை ஒருங்கிணைப்பதற்கான சிறப்பு முயற்சி இதுவாகும்.

அக்டோபர் 31 என்பது முன்னாள் பிரதமர் இந்திரா காந்தியின் நினைவு தினமும் ஆகும். அவருக்கு மரியாதை செலுத்துகிறேன்.

அடுத்து வரும் பண்டிகைக் காலத்தில் உள்ளூர் பொருள்களுக்கும் விஷயங்களுக்கும் நாம் முன்னுரிமை அளிக்க வேண்டும். நீங்கள் சுற்றுலா சென்றாலும், புனிதத் தலங்களுக்கு யாத்திரை சென்றாலும் உள்ளூர் கைவினைக் கலைஞர்கள் தயாரித்த பொருள்களையே வாங்க வேண்டும் என்று வேண்டுகோள் விடுக்கிறேன்.