ഇണങ്ങിയും പിണങ്ങിയും ഞങ്ങൾ...

ഞങ്ങൾ തമ്മിൽ ചിലപ്പോൾ പൊട്ടിത്തെറികളൊക്കെ ഉണ്ടാകും. പക്ഷേ അതൊക്കെ കുറച്ചുനേരത്തേയ്ക്ക് മാത്രമേയുള്ളൂ. അതുകഴിഞ്ഞ് എല്ലാം ഒത്തു തീർപ്പാക്കും.

- അപ്പൂസ് കെ.എസ്

രതിനിർവ്വേദത്തിലെ പപ്പു എന്ന ഒരൊറ്റ കഥാപാത്രം മാത്രം മതി മലയാളികൾക്ക് ശ്രീജിത്ത് വിജയ് എന്ന നടനെ പരിചയപ്പെടുത്താൻ. ശ്വേതാമേനോൻ നായികയായെത്തിയ രതിനിർവേദം എന്ന ചിത്രത്തിലാണ് പതിനേഴുകാരനായിരുന്ന പപ്പു എന്ന കഥാപാത്രത്തെ ശ്രീജിത്ത് അതിമനോഹരമായി അഭിനയിച്ച് ഫലിപ്പിച്ചത്. ആദ്യചിത്രത്തിലുടെതന്നെ നായകനായി വന്ന ശ്രീജിത്ത് ചുരുങ്ങിയ സമയം കൊണ്ടാണ് മലയാളികൾക്കിടയിൽ ശ്രദ്ധ നേടിയെടു ത്തത്. തുടർന്ന് ഒരുപിടി നല്ല സിനിമകളുടെ ഭാഗമാവുകയു ചെയ്തു. ശേഷം അഭിനയജീവിതത്തിൽ നിന്നും മാറി റേഡിയോ ജോക്കിയുടെ വേഷത്തിലാണ് വീണ്ടും പ്രേക്ഷകർക്കിടയിൽ സജീവമായത്. മൂന്നുവർഷം ദുബായ് ആസ്ഥാനമായി പ്രവർത്തിച്ചിരുന്ന എഫ്.എം.സ്റ്റേഷനിൽ ജോലി ചെയ്തു. ശേഷം നീണ്ട ഒരു ഇടവേള എടുത്ത് വീണ്ടും അഭിനയരംഗത്തേയ്ക്ക് തിരിച്ചെത്തി.

ഡി ഫോർ ഡാൻസിന്റെ അവതാരകന്റെ വേഷത്തിൽ മിനിസ്ക്രീൻ പ്രേക്ഷകർക്കിടയിൽ ശ്രദ്ധ നേടിയെടുത്തതിനുശേഷം വീണ്ടും സീരിയലിലൂടെ തുടക്കം. സീ കേരളം ചാനലിന്റെ തുടക്കകാലത്തുണ്ടായിരുന്ന സ്വാതി നക്ഷത്രം ചോതി' എന്ന സീരിയലിലൂടെയാണ് ആദ്യമായി ടെലിവിഷനിൽ തിളങ്ങിയത്. പിന്നീട് സിനിമയിലും ടെലിവിഷനിലും ഒരേപോലെ തുടരുകയാണ് ശ്രീജിത്ത്. 2018 ലാണ് ശ്രീജിത്തിന്റെ ജീവിതത്തിലേക്ക് കണ്ണൂർ സ്വദേശിയായ അർച്ചന എത്തുന്നത്. 2018 മെയ് 12 നായിരുന്നു ഇവരുടെ വിവാഹം. ശ്രീജിത്തിന്റെ ഉയർച്ചകളിലും താഴ്ചകളിലുമൊക്കെ സന്തതസഹചാരിയായി കൂടെയുള്ളത് അർച്ചനയാണ്. ഐ.ടി ഉദ്യോഗസ്ഥയായ അർച്ചനയാണ് ശ്രീജിത്തിന്റെ കരിയറിൽ ഏറ്റവുമധികം സപ്പോർട്ട് നൽകുന്നത്.

ദാമ്പത്യജീവിതം അഞ്ചുവർഷത്തിൽ എത്തിനിൽക്കുമ്പോൾ

 ജീവിതത്തിലെ ഇണക്കങ്ങളും പിണക്കങ്ങളും സന്തോഷങ്ങളുമെല്ലാം ശ്രീജിത്തും അർച്ചനയും പ്രേക്ഷകരോട് പങ്കുവയ്ക്കുന്നു... വിവാഹജീവിതം അഞ്ചുവർഷത്തിൽ എത്തിനിൽക്കുമ്പോൾ... ശ്രീജിത്ത് ഒരുപാട് സന്തോഷം തോന്നുന്നു. അങ്ങോ ട്ടുമിങ്ങോട്ടും പരസ്പരം മനസ്സിലാക്കിയ അഞ്ചുവർഷം. ഈ അഞ്ചുവർഷവും ഞങ്ങൾ അടിപൊളിയായിട്ടാണ് ജീവിച്ചത്. ഇനിയങ്ങോട്ടും ഇങ്ങനെ തന്നെ അടിപൊളിയായി സന്തോഷത്തോടുകൂടി മുന്നോട്ടുപോകണം.