ഓർമകളുടെ ചിരിക്കൂട്ടിൽ

കാത്തിരുന്ന് കിട്ടിയ കൺമണികളെ കണ്ടു കൊതിതീരും മുമ്പേയാണ് കൊച്ചിൻ ഹനീഫ മരണത്തിലേക്ക് മടങ്ങിയത്. ഓർമകൾ ബാക്കിവെച്ച ചിരിനിലാവിൽ ഫാസിലയും മക്കളും

- സിറാജ് കാസിം

വാതിൽ തുറന്ന് ഫാസില അകത്തേക്ക് ക്ഷണിക്കുമ്പോൾ ചുവരിൽ അതാ എൽദോ ഇരുന്ന് ചിരിക്കുന്നു. ഗോപാലകൃഷ്ണനെ ഓടിച്ചിട്ട് പിടിച്ച് ഗർവാസീസ് ആശാന്റെ മുന്നിൽ നിർത്തി “ആ കാലുകൾ എന്റേതാണ്. എന്ന ഡയലോഗ് അടിച്ച അതേ എൽദോ. സ്വീകരണമുറിയുടെ ചുവരിലെ ആ ചിത്രത്തിൽ പിന്നെയും ഒരുപാട് മുഖങ്ങൾ തെളിഞ്ഞു. കിരീടത്തിലെ ഹൈദ്രോസും പഞ്ചാബി ഹൗസി'ലെ ഗംഗാധരൻ മുതലാളിയും 'ഹിറ്റ്ലറി'ലെ ജബ്ബാറും "ഈ പറക്കും തളിക'യിലെ വീരപ്പൻ കുറുപ്പും പുലി വാൽ കല്യാണത്തിലെ ധർമേന്ദ്രയും ഒക്കെയായി ഒരുപാടുപേർ.

വെള്ളിത്തിരയിൽ ചിരിയുടെ പൂക്കാലമായിരുന്ന കൊച്ചിൻ ഹനീഫ ലോകത്തോട് വിട ചൊല്ലിയിട്ട് 13 വർഷമായെങ്കിലും കുടുംബം ഇപ്പോഴും ഓർമകളുടെ ചിരിക്കൂട്ടിൽ തന്നെയാണ്. ഹനീഫയുടെ ഭാര്യ ഫാസിലയും മക്കളായ സഫയും മർവയും താമസിക്കുന്ന എറണാകുളം കടവന്ത്രയിലെ വാടകവീട് നിറയെ അദ്ദേഹത്തിന്റെ ചിത്രങ്ങൾ ചിരി തൂകി നിൽക്കുന്നു.

കൊതിതീരും മുമ്പേ

നോമ്പ് കാലമായതിനാൽ ഇഫ്താറിനുള്ള ഒരുക്കത്തിലാണ് ഫാസിലയും മക്കളായ സഫയും മർവയും. പ്ലസ് ടു വിദ്യാർഥികളാണ് ഹനീഫയുടെയും ഫാസിലയുടെയും ഈ ഇരട്ടക്കുട്ടികൾ. “മക്കൾക്ക് മൂന്ന് വയസ്സുള്ളപ്പോഴാണ് ഇക്ക ഞങ്ങളെ വിട്ടുപോകുന്നത്. കുറേ വൈകിയാണ് ഹനീഫിക്ക കല്യാണം കഴിച്ചത്. 1994-ൽ കല്യാണം കഴിഞ്ഞ് 12 വർഷങ്ങൾക്കു ശേഷമാണ് ഞങ്ങൾക്ക് കുട്ടികളുണ്ടാകുന്നത്. ഒരു പാട് നാളത്തെ കാത്തിരിപ്പിനുശേഷം കിട്ടിയ മക്കളെ കണ്ട് കൊതി തീരുന്നതിന് മുമ്പേ ഇക്ക...'' ഓർമകളുടെ സങ്കടത്തിൽ ഫാസിലയുടെ വാക്കുകൾ മുറിയുമ്പോൾ സഫ ഇടയ്ക്കു കയറി. “ബാപ്പിച്ചിയെ കണ്ട ഓർമ ഞങ്ങൾക്കുമില്ല. എന്നാൽ ബാപ്പിച്ചി ഇപ്പോഴും ഞങ്ങൾക്കൊപ്പമുണ്ട്. സിനിമകളിലൂടെ ഞങ്ങൾ വീണ്ടും വീണ്ടും ബാപ്പിച്ചിയെ കാണുന്നു. ബാപ്പിച്ചി ഇപ്പോൾ ഉണ്ടായിരുന്നങ്കിലെന്ന് ആഗ്രഹിക്കാറുണ്ട്. സഫയുടെ ശബ്ദം ചെറുതായൊന്ന് ഇടറി.

പരസ്യമായ രഹസ്യം