വിപ്ലവത്തിന്റെ ശബ്ദം

മലയാളിയുടെ വിപ്ലവകാലത്തിന്റെ ശബ്ദമാണ് പി.കെ. മേദിനി. പാടിയ കുറ്റത്തിന് പലതവണ ജയിലിലടയ്ക്കപ്പെട്ട ഗായിക. നവതിയിലേക്കെത്തുമ്പോഴും അവരുടെ ശബ്ദത്തിലെ വിപ്ലവോർജത്തിന്റെ കരുത്ത് ഏറുന്നതേയുള്ളൂ...

- സുപ്രദ പ്രസാദ്

സമരമുഖങ്ങൾക്ക് ഈണങ്ങളുടെ രക്തശോഭ ചാർത്തിയ വിപ്ലവ ഗാനങ്ങൾക്ക് ഇന്നും നിറം മങ്ങിയിട്ടില്ല. ഈ ഗാനങ്ങൾ ജനമനസ്സുകളിലെത്തിച്ച പി.കെ. മേദിനിക്ക് പ്രായം തൊണ്ണൂറ്. പാടിത്തുടങ്ങിയ കാലത്തെ പന്ത്രണ്ടുകാരിയെപ്പോലെയാണ് അവരിപ്പോഴും. കാലം കെടുത്തി കളയാത്ത പ്രസരിപ്പ്, മലയാളികളുടെ മനസ്സിൽ വിപ്ലവത്തിരമാലകൾ അലയടിച്ച ശബ്ദസമുദ്രമായിരുന്നു പി.കെ. മേദിനി, അസമത്വത്തിനും അനീതിക്കും എതിരായ അടിസ്ഥാന വർഗത്തിന്റെ പോരാട്ടത്തിന് അവർ ശബ്ദത്തിലൂടെ ഊർജമേകി. പടപ്പാട്ടുകാരി എന്ന വിശേഷണത്തിനു പിന്നിൽ നേരിടേണ്ടി വന്ന ദുരനുഭവങ്ങൾ ഏറെയായിരുന്നു. കഷ്ടപ്പാടുകളും പോരാട്ടങ്ങളും നിറഞ്ഞ ബാല്യം, പാടിയതിന് പിഴയായി തേടി വന്ന ജയിൽ ശിക്ഷ. പുന്നപ്ര വയലാർ സമര സേനാനികളിൽ ജീവിച്ചിരിക്കുന്ന ഏക വനിതയാണിന്ന് പി.കെ. മേദിനി. ഓഗസ്റ്റിൽ നവതിയുടെ നിറവിലെത്തുമ്പോഴും നന്മയ്ക്കും നീതിക്കും വേണ്ടിയുള്ള പോരാട്ടത്തിൽ നിന്ന് അവർ അവധിയെടുക്കുന്നില്ല.

ദുരിതം നിറഞ്ഞ ബാല്യം

ആലപ്പുഴ ആറാട്ടുപുഴ പുത്തൻപുരയ്ക്കൽ വീട്ടിൽ കങ്കാളി(കേശവൻ) യുടെയും പാപ്പിയുടെയും മകളായി 1933 ഓഗസ്റ്റ് എട്ടിനായിരുന്നു പി.കെ. മേദിനിയുടെ ജനനം. പന്ത്രണ്ട് മക്കളിൽ ആറുപേർ മേദിനി ജനിക്കുന്നതിന് മുൻപുതന്നെ മരിച്ചു. ട്രേഡ് യൂണിയൻ നേതാവായിരുന്ന കെ. ബാവ സഹോദരനാണ്. തിരക്കഥാകൃത്ത് പി.കെ.ശാരംഗപാണിയാണ് മറ്റൊരു സഹോദരൻ. കർഷകനായിരുന്ന അച്ഛന്റെ വരുമാനമായിരുന്നു കുടുംബത്തിന്റെ ഏക ആശ്രയം. ഇടയ്ക്ക് വല്ലപ്പോഴും അമ്മ കയർപിരി ജോലികൾക്കും പോകും. അമ്മയുടെ അമ്മാനപ്പാട്ടുകളാണ് മേദിനിയെ പാട്ടിലേക്ക് ആകർഷിച്ചത്. സ്കൂളിൽ പാട്ടുകൾ പാടുമായിരുന്നു. എന്നാൽ പണമില്ലാത്തതിനാൽ ആറാം ക്ലാസ്സിൽ പഠനം നിലച്ചു. സമരവേദികളിൽ പാടാനെത്തുമ്പോൾ മേദിനിക്ക് പ്രായം 12.

മൈക്കില്ലാത്ത കാലം