ആനപ്പുറമേറി ഒട്ടകത്തലമേട്ടിൽ

കുമളിയിലെ മഞ്ഞിലും കുളിരിലും മാഞ്ഞുറങ്ങുന്ന മേട്. ഒറ്റനോട്ടത്തിൽ തന്നെ രണ്ട് സംസ്ഥാനങ്ങൾ കാണാം ഒട്ടകത്തലമേട് കയറിച്ചെന്നാൽ

- AJMAL PAZERI

 “ജീവിതമെനിക്കേകുന്നതായിരം
പൂവുകൾതൻ സുഗന്ധങ്ങളെങ്കിലും
ഏറ്റമിഷ്ടമെനിക്ക് മഴയുടെ
യാദ്യചുംബനമേറ്റ മണ്ണിൻ മണം

വളഞ്ഞ് പുളഞ്ഞ് വണ്ടി വളഞ്ഞങ്ങാനമെത്തിയപ്പോൾ മനസ്സിലേക്ക് കടന്നുവന്നത് ഒ.എൻ.വി.യുടെ ഈ വരികളായിരുന്നു. ആദ്യ ചുംബനമേറ്റ മണ്ണിന്റെ മണം പരന്നു. ശരീരത്തിനുള്ളിലേക്ക് തുളച്ച് കയറുന്ന തണുപ്പുമുണ്ട്. വളഞ്ഞങ്ങാനം വെള്ളച്ചാട്ടം കുമിളി തേക്കടിയിലേക്കുളള പ്രവേശന കവാടമാണ്. നല്ല തിരക്കുണ്ട്. സമീപത്തായി ചെറിയ ചായക്കടകൾ, ചായ കുടിച്ച് തണുപ്പകറ്റാനായി കടകൾക്ക് മുന്നിൽ ആളുകളുടെ നീണ്ടവരി. അതിലൊരു വരിയിലേക്ക് ഞാനും ചേർന്നു. നല്ല ചൂട് ചായ. പക്ഷെ ആ തണുപ്പിൽ ചായയുടെ ചൂട് പെട്ടെന്ന് ആറിപ്പോയി. അതിനിടെ ചായക്കടയിലെ ചേച്ചിയെ പരിചയപ്പെട്ടു. പേരു വിജയമ്മ. വർഷങ്ങളായി ഇവിടെ ചായക്കട നടത്തുന്നു. എല്ലാ കാലത്തും വെള്ളച്ചാട്ടത്തിന് ഈ ശക്തിയുണ്ടാവില്ല. ജൂൺ മുതൽ ഓഗസ്റ്റ് വരെ നല്ല ശക്തിയിൽ വെള്ളം ചാടും. ആ സമയത്ത് ഒരുപാട് വണ്ടികളും ഇവിടെ നിർത്തും. തേക്കടിയിലേക്ക് പോകുന്നവരുടെ ആദ്യത്തെ സ്റ്റോപ്പാണിത്. വിജയമ്മ പറഞ്ഞു.

ചായ കുടിച്ച് തീർന്നപ്പോഴേക്കും മഴ മാറിനിന്നു. അപ്പോഴേക്കും വെള്ളച്ചാട്ടം താഴേയ്ക്ക് പതിക്കുന്നിടത്ത് മറ്റൊരു ചാറ്റൽമഴ' രൂപപ്പെട്ടിട്ടുണ്ട്. കുറച്ച് നേരത്തെ അലച്ചിലിന് ശേഷം അവിടെ നിന്ന് വണ്ടികയറി.

വളഞ്ഞങ്ങാനം കഴിഞ്ഞപ്പോഴാണ് സുഹൃത്ത് കെൽവിൻ വിളിക്കുന്നത്. തേക്കടി ഭാഗത്തേക്കാണന്ന് പറഞ്ഞപ്പോൾ അവൻ ഒരു കാര്യം ഓർമിപ്പിച്ചു. എല്ലാവരും സ്ഥിരം പോകുന്ന വഴിയിൽ നിന്ന് ഒന്ന് മാറ്റിപ്പിടിക്ക്. ഒട്ടകത്തലമേട് കണ്ടിട്ടുണ്ടോ?. ഇല്ലെങ്കിൽ അവിടേക്ക് വിട്ടോ. ഒപ്പം അരുവിക്കുഴി വ്യൂ പോയന്റിലും കേറ്, ഒട്ടകത്തലമേടിലെ ആനസഫാരിയും ഗംഭീരമാണ്. അതും പറഞ്ഞ് അവൻ തന്നെ യാത്രയുടെ പ്ലാൻ വരച്ചുതന്നു. ആദ്യം അരുവിക്കുഴി പോവൂ, അതിനുശേഷം ആനപ്പുറത്ത് കേറ്. എന്നിട്ട് സന്ധ്യക്ക് ഒട്ടകത്തലമേട് പോയാൽ മതി. എല്ലാം ഒരേ റൂട്ടിലാ..'തേക്കടിയിലെ ഒരു ഗൈഡിന്റെ നമ്പർ വാട്സാപ്പ് ചെയ്തിട്ടുണ്ടെന്നും ജീപ്പ് ട്രെക്കിങ്ങാവും നല്ലതെന്നും കൂടി ഓർമ്മപ്പെടുത്തി. ഗഡിനെ വിളിച്ചു. പേര് നവേഷ് കുമാർ. തേക്കടിയിൽ അദ്ദേഹം കാത്തുനിൽക്കും .

അതിർത്തിയിലേക്ക്