നന്മകളിൽ നന്മ പകർത്തുന്ന വിഷു

മനുഷ്യൻ പ്രകൃതിയെ നിലനിൽപ്പിനായി ആരാധിക്കുന്നതിന്റെ മഹനീയ നിമിഷങ്ങളാണ് വിഷു ആചാരങ്ങളുടെ മഹനീയ സന്ദേശം. ഏവർക്കും വിഷു പുതുവത്സരാശംസകൾ നേരുന്നു.

വിഷുപ്പക്ഷി ഉച്ചത്തിൽ കൂവിക്കൊണ്ടിരുന്നു. ഉഷ്ണത്തിൽ നിന്ന് അൽപ്പം ആശ്വാസത്തിനായി കിഴക്കേ കോലായിലേയ്ക്ക് തപ്പിത്തടഞ്ഞു വന്ന മുത്തശ്ശി ഉച്ചത്തിൽ വിളിച്ചുപറഞ്ഞു.. താത്രി വിഷു എത്തീന്നാ തോന്നണേ.. കണ്ണ് കാണാൻ പാടില്ലാത്ത മുത്തശ്ശിയോടും വിഷുപ്പക്ഷി വിഷുക്കാലം വിളിച്ചറിയിച്ചു. വിഷുവും വിഷുക്കാലവും മലയാളികൾക്ക് അതിരറ്റ സന്തോഷക്കാലം തന്നെയാണ്. പലതരം ഫലങ്ങളാൽ നിറഞ്ഞതും, ഉഷ്ണകാലത്തിന്റെ ഭീകരത അൽപ്പം കുറഞ്ഞു വരുന്നതിന്റെ ആശ്വാസവും, വാകയും, കൊന്നയും, മരുത്ത് വൃക്ഷങ്ങളും, മുല്ലയും പൂത്തുലഞ്ഞു നിൽക്കുന്ന പ്രകൃതിയും കൽപ്പനകൾക്ക് ആഹ്ലാദം നൽകുന്ന കാഴ്ച തന്നെയാണ്. എല്ലാ ആഘോഷങ്ങളും ഐതിഹ്യകഥകളുമായി ബന്ധപ്പെട്ടാണ് നാം ആഘോഷിക്കാറുള്ളത്. എല്ലാ ആഘോഷങ്ങളുമായി ബന്ധപ്പെട്ട് അനവധി ഐതിഹ്യങ്ങൾ നിലനിൽക്കുന്നുണ്ട്. ഐതിഹ്യങ്ങളിലെ വ്യത്യാസങ്ങൾക്കനുസരിച്ച് ആചാരങ്ങളിലെ വ്യത്യാസം എല്ലാ ആഘോഷങ്ങളിലും കാണപ്പെടാറുണ്ട്. വിഷുവിനെ സംബന്ധിച്ചും അപ്രകാരം ആചാരവൈവിധ്യം കാണപ്പെടുന്നുണ്ട്.

വസന്ത നവരാത്രിയിൽ വിഷു